Арменияттан киирбит мөлтөх хаачыстыбалаах вино уонна коньяк атыыта тохтотулунна

Арассыыйаҕа Роспотребнадзор бэрэбиэркэтин түмүгүнэн, Арменияҕа оҥоһуллубут мөлтөх хаачыстыбалаах испиирдээх утахтары атыылааһын тохтотулунна.

Биэдэмистибэ иһитиннэрэринэн, бу хааччахтарга «Веди-Алко», «Абовянскайдааҕы коньяк собуота» уонна «Шахназарян» вино-коньяк дьиэтин оҥорон таһаарыылара түбэстилэр. «Роспотребнадзор Армения Өрөспүүбүлүкэтигэр оҥоһуллубут мөлтөх хаачыстыбалаах  арыгы бородууксуйатын булан таһаарда, ону Арассыыйаҕа атыылааһын тохтотулунна», — диэн официальнай иһитиннэриигэ этиллэр.

Кэһиилэр маннык утахтарга көһүннүлэр:

• «Гетап Вернашен» кыһыл полусладкай винотугар;
• «Веди Алко» Харджи маҥан сухой винотугар;
• Т3 «Легенды Arni» виноҕа.

Ону таһынан, бобуллубут испииһэккэ биэс сыллаах «Армянский коньяк 5 звезд» ординарнай коньяк уонна сэттэ сыллаах марочнай «Шахназарян ХО» коньяктар киирдилэр.

Кутталлаах табаар дьоҥҥо тиийбэтин туһуттан, Роспотребнадзор атыы-эргиэн тэрилтэлэригэр уонна импортердарга бу утахтары атыыттан уһулар туһунан иһитиннэрии ыытта. Билиҥҥи туругунан, дьыала биэдэмистибэ кытаанах хонтуруолугар баар.