«Стоп-алкоголь» түмүгэ

Саха сиригэр полициялар «Стоп-алкоголь» рейдэҕэ, итирдэр утаҕы сокуону кэһэн атыылааһын түөрт түбэлтэтин туттулар.

Дьокуускай куоракка сокуоннай сааһын туола илик оҕолор дьыалаларынан дьарыктанар иниспиэктэрдэр Лермонтов уулуссаҕа баар маҕаһыыҥҥа оҕоҕо итирдэр утаҕы атыылаабыттарын туттулар. Маны таһынан, полиция үлэһиттэрэ Дьокуускайга уонна Ленскэйгэ баар бородуукта маҕаһыыннарын үлэһиттэрэ сокуонунан олохтоммут бириэмэни кэһэн, киэһэ 20:00 чаас кэнниттэн, итирдэр утаҕы атыылыы турбуттарын быһаарда. Маны сэргэ, Дьокуускайга Покровскайдыыр суолга баар баарга иһиттээх арыгыны аспакка эрэ  атыылааһын түбэлтэтэ тахсыбыта биллибит.

Буруйу оҥорооччуларга административнай боротокуоллар толорулуннулар. Полицейскайдар рейдэлэрин салгыы ыыталлар.