Атамай оскуолатыгар — агротехнологическай кылаас!

Горнай улууһун В.Д. Лонгинов аатынан Атамай орто оскуолатыгар «Агроинженерия» хайысхалаах саҥа агротехнологическай кылаас үөрүүлээх арыллыыта буолла! Бу үөрүүлээх түгэн оскуола сайдыытыгар саҥа кэрдииһи арыйда!

Бу балысхан бырайыак «АПК-ҕа каадырдар» федеральнай бырайыак уонна «Ас-үөл куттала суох буолуутун технологическай хааччыйыы» национальнай бырайыак чэрчитинэн олоххо киирэр.

Саҥа үөрэх дьылыгар бу кылааска 7-с уонна 8-с кылаастартан сүүрбэ аҕыс үөрэнээччи дьарыктаныаҕа. Оҕолор ылбыт билиилэрин төрөппүттэригэр хаһаайыстыбаларын көрүүтүгэр көмөлөһөн, олохтоох тыа хаһаайыстыбатын табаар оҥорооччуларыгар стажировка барар кыахтаныахтара. Онтон оскуоланы бүтэрэллэригэр бэйэлэрин бэлэм агробырайыактарын оҥоруохтара.

Бырайыак сүрүн уратытынан үрдүк үөрэх эйгэтин кытта ыкса ситимнээх үлэтэ буолар. Билим өттүнэн доҕуһуоллааһыҥҥа оскуола Саха Өрөспүүбүлүкэтин Арктическай судаарыстыбаннай агротехнологическай университетын уонна К.А. Тимирязев аатынан университеты – МСХА кытта бииргэ үлэлиэҕэ. Бу үөрэнээччилэргэ өрөспүүбүлүкэ уонна дойду бастыҥ үөрэтээччилэрин салайыытынан үрдүк үөрэх кыһаларын ньымаларынан үөрэнэр кыаҕы биэриэҕэ.

Бу саҥаны киллэриинэн үөрэнээччилэри уонна үөрэтээччилэри ытыктабыллаах ыалдьыттар эҕэрдэлээтилэр:
Ньургуйаана Алексеевна Захарова — СӨ тыа хаһаайыстыбатын министиэристибэтин экэниэмикэҕэ уонна стратегическай торумнааһыҥҥа департаменын сүрүн исписэлиһэ; Никита Викторович Андреев — «Горнай улууһа» МТ баһылыга; Айсен Егорович Павлов — Атамай нэһилиэгин баһылыга; Мортена Васильевна Матаннанова — АГАТУ Бырайыак офиһын салайааччыта;  Ньургуйаана Михайловна Скрябина — АГАТУ Эбии идэтийбит үөрэхтээһин институтун дириэктэрэ; Михаил Михайлович Миронов — тыа хаһаайыстыбатын билимин кандидата, «Агроэксперт» ООО билим салайааччыта; Варвара Ильинична Сметанина — Горнай оройуонугар үөрэх управлениетын начаалынньыга; Роман Леонидович Филиппов — Горнай оройуонун тыа хаһаайыстыбатын управлениетын начаалынньыга.

Бырайыак инвесторынан бэрэссэдээтэл Павел Петрович Чириков салалтатынан «Арыылаах» тыа хаһаайыстыбатын кэпэрэтиибэ буолла. Хаачыстыбалаах быраактыканы хааччыйар сыалтан СХППК «Горный-Ас» тэрилтэни кытта бииргэ үлэлээһин туһунан дуогабар түһэрсилиннэ.

Үөрэх кылааһа аныгы тэрилинэн толору хааччылынна. Үөрэх барыла биологияны, химияны, физиканы уонна математиканы дириҥник үөрэтиини кэрэһэлиир. Ону таһынан, оҕолорго үөрэх таһынан маннык хайысхаларга дьарыктар тэрилиннилэр:
Агроробототехника;
Агродроннары салайыы;
3D-моделирование уонна бэчээттээһин (аһыллыыга үөрэнээччилэр дрон салайан уонна 3D-принтерга макеты бэчээттээн холонон көрдүлэр);
«Эдэр агроинженер» уонна «Сити-фермерство» барыллар.

Маннык кылаас арыллыыта – кэнэҕэс төрөөбүт оройуонун эрэ буолбакка, Саха сирин барытын технологическай суверенитетын уонна ас-үөл куттала суох буолуутун хааччыйар үрдүк таһымнаах идэлээх каадырдары бэлэмнээһиҥҥэ улахан хардыынан буолар.

Татьяна Павлова, оскуола дириэктэрин агроүлэҕэ солбуйааччыта
Акулина Филиппова хаартыскаҕа түһэриитэ