Атырдьах ыйыгар орто үөрэххэ докумуону туттарар күҥҥэ ыҥыраллар

Атырдьах ыйын 7 күнүгэр Дьокуускай куорат Доҕордоһуу болуоссатыгар орто анал үөрэххэ докумуону туттарыы биир кэлим күнэ биллэриллэр.

Тэрээһин иитинэн талбыт орто идэҕитигэр сайабылыанньаҕытын биэрэр кыахтааххыт. Үөрэх тэрилтэлэрин исписэлиистэрэ сэҥээрбит идэҕит, үөрэх усулуобуйатын, салгыы үүнэр-сайдар кыах төһө баарын туһунан кэпсиэхтэрэ, ыйытыыларгытыгар хоруйдуохтара.

Өрөспүүбүлүкэ үрдүнэн кэлэр үөрэх дьылыгар 54 тэрилтэ орто үөрэххэ устудьуоннары ылар. Барыта 6 864 босхо миэстэ көрүллэн турар.

СӨ Үөрэҕин уонна билимин министиэристибэтин иһинэн Идэҕэ бэлэмниир үөрэх тэрилтэлэрин сайыннарар институкка иһитиннэрбиттэринэн, тэрээһиҥҥэ улууска баар орто үөрэх кыһаларын бэрэстэбиитэллэрэ эмиэ кэлэллэрэ күүтүллэр. Куорат үөрэҕин тэрилтэлэрэ бары кыттыахтаахтар, ону таһынан улууска баар үөрэх кыһалара кэлэн докумуон тутуохтаахтар диэн иһитиннэрдилэр. Онон орто үөрэххэ туттарсааччылар, үрдүк үөрэххэ киирэргэ бааллара хапсыа суох оҕолор бэйэҕитин кытта докумуоҥҥутун илдьэ кэлэн хас даҕаны үөрэх тэрилтэтигэр, араас идэҕэ биир күн туттараргытыгар кыах үөскүүр. Маныаха пааспар, аттестат уонна 3х4 кээмэйдээх хаартыска ирдэнэр.

Тэрээһин атырдьах ыйын 7 күнүгэр, Доҕордоһуу болуоссатыгар сарсыарда 10 ч саҕаланар. Түгэни мүччү тутумаҥ!

Үөрэххэ туттарсыы, чэпчэтии эбэтэр эбии тургутуу туһунан ыйытыылаах буоллаххытына 122 (доб. 9) төлөпүөнүнэн чопчулаһыаххытын сөп. Колл-киин исписэлиистэрэ үлэ күнүгэр 9:00 — 18:00 чааска диэри үлэлииллэр.