Байыаннай дьайыы бэтэрээннэрэ “Абилимпикс” чөмпүйэнээтигэр кыттыахтара

Сарсын, бэс ыйын 26 күнүгэр, Казань куоракка “Абилимпикс” профессиональнай маастарыстыба чөмпүйэнээтигэр Саха сириттэн  байыаннай дьайыы алта бэтэрээнэ кыттыыны ылыаҕа.

Тэрээһин Арассыыйа бэрэсидьиэнэ Владимир Путин дьаһалынан тэриллэн, «Ыччат уонна оҕолор» национальнай бырайыак чэрчитинэн иккис сылын ыытыллар. Саха сирин аатыттан чөмпүйэнээккэ Александр Иннокентьев, Дмитрий Килигин, Герасим Ксенофонтов, Иван Олесов, Родион Платонов уонна Эдгор Солихов кыттыахтара. Кинилэр биэс идэҕэ күрэхтэһиэхтэрэ: массыынаны өрөмүөннээһиҥҥэ, ас астааһыҥҥа, миэбэли оҥорууга, электромонтажка уонна массыынаны ыытыыга.

«Биһиги бэтэрээннэрбитигэр “Абилимпикс” чөмпүйэнээтигэр кыттыы идэтийбит дьоҕурдарын бэрэбиэркэлээһин эрэ буолбатах, саҥа, эйэлээх олоххо улахан суолталаах хардыыны оҥоруу буолар. Бэтэрээннэр күрэхтэһиигэ турунан туран бэлэмнэммиттэрэ, Пуонда филиала кинилэри хас биирдии түһүмэххэ өйөөбүтэ — кыттар идэлэрин талан ылыыттан саҕалаан психологическай бэлэмнээһиҥҥэ тиийэ. Саха сирин күүстээх уонна сыаллаах-соруктаах уолаттар көмүскүөхтэрэ диэн киэн туттабыт”, — диэн бэлиэтээтэ “Аҕа дойдуну көмүскээччилэр” Пуонда салаатын салайааччыта Алексей Александров.

Татарстан киин куоратыгар 800-тэн тахса кыттааччы — Арассыыйа бары эрэгийиэннэриттэн кэлбит байыаннай дьайыы бэтэрээннэрэ, эспиэрдэр, арыаллааччылар мустуохтара. Дьоруойдар 21 идэҕэ сатабылларын көрдөрүөхтэрэ. Сүрүн күрэхтэһиилэртэн ураты, кыттааччылар сэттэ көрдөрүүлээх компетенцияҕа күүстэрин холоон көрүөхтэрин сөп.

«Абилимпикска” Саха сирин аатыттан кыттарым миэхэ улахан чиэс. Байыаннай дьайыы бэтэрээннэрэ саҥа хайысхалары ситиһиилээхтик баһылыыр кыахтаахтарын көрдөрүөхпүн баҕарабын», — диэн чөмпүйэнээт кыттыылааҕа уонна байыаннай дьайыы бэтэрээнэ Герасим Ксенофонтов санаатын үллэһиннэ.

Чөмпүйэнээт дьыалабыай бырагыраамата ыарахан бааһырыылаах бэтэрээннэри өйүүр уонна үлэнэн хааччыйар систиэмэни сайыннарыыга,  идэлээх уонна социальнай адаптация баралларыгар табыгастаах усулуобуйаны тэрийиигэ туһуланыаҕа. Кыттааччылар сулууспалыыр, реабилитацияны барар, үөрэнэр уонна хаттаан үөрэнэр  кэмнэригэр ылбыт уопуттарын, билиилэрин уонна сатабылларын туһанан  карьераны хайдах оҥоруу туһунан дьүүллэһиэхтэрэ. Ону тэҥэ арыаллааһыҥҥа, адаптацияҕа уонна идэни сайыннарыыга ситиһиилээх ньымалары эмиэ үөрэтиэхтэрэ.

СӨ Ил Дарханын уонна Бырабыыталыстыбатын пресс-сулууспата.