Байыаннай дьайыы бэтэрээннэрэ Саха сиринээҕи Филармония кэнсиэригэр сырыттылар

«Айан дойдуну көмүскээччилэр» пуонда филиалын уонна Саха сиринээҕи Филармонияны кытта бииргэ үлэлиир бырагыраама чэрчитинэн, байыаннай дьайыы бэтэрээннэрэ уонна кинилэр дьиэ кэргэттэрэ ааттаах-суоллаах композитор Александр Зацепин 100 сааһыгар анаммыт «Оркестры кытта ылыыбыт» кэнсиэргэ сырыттылар. Тэрээһин А.Е. Кулаковскай аатынан Норуоттар доҕордоһууларын дьиэтигэр буолла.

«Пуонда филиалын уонна социальнай координатор Анна Шишунова көмөтүнэн бойобуой табаарыһым Петр Аргуновтыын сүрдээх үчүгэй кэнсиэргэ сырыттыбыт. Эдэри сааспытын, ырыаларбытын-тойуктарбытын санаан кэллибит. Барыта кэрэ этэ. Итиитик-истиҥник ыытыллыбыт киэһэ иһин ис сүрэхпититтэн махтанабыт», – диэн кэпсээтэ байыаннай дьайыы бэтэрээнэ Анатолий Николаев.

Бэтэрээннэр бэлиэтээбиттэринэн, бу киэһэ сыанаттан сэбиэскэй киинэлэртэн тапталлаах ырыалар-күүлэр тыаһаатылар – хас да көлүөнэ дьон билэр, билигин да истиҥ иэйиини үөскэтэр мелодиялар. Максим Ноговицын салайааччылаах Саха сиринээҕи Филармония «Симфоника АРТика» Судаарыстыбаннай симфоническай оркестра оонньоото.

Бырагыраамаҕа Александр Зацепин айар үлэтин араас кэрчиктэрэ киирбиттэр: лирическэй оркестровай нүөмэртэртэн саҕалаан, «Бриллиантовая рука», «Кавказская пленница», «Иван Васильевич меняет профессию», «31 июня», «Женщина, которая поёт» киинэлэртэн норуокка киэҥник биллэр ырыаларга тиийэ.

Тэрийээччилэр этэллэринэн, бастакы нүөмэртэртэн саҕалаан саалаҕа ураты – олус истиҥ, итии, махталынан толору эйгэ үөскээбит. Кинилэр көрөөччүлэри «кэпсэтинньэҥ» диэн бэлиэтээтилэр: көрөөччүлэр бары ырыаны артыыстары кытта бииргэ олорон ааспыттар.

«Айан дойдуну көмүскээччилэр» пуонда филиала култуурунай социализация нөҥүө байыаннай дьайыы бэтэрээннэригэр эйэлээх олоххо төннөллөрүгэр көмөлөһөр. Болҕомто, көҕүлээһин уонна искусство манна Дойдуну көмүскээбиттэри өйүүр тутаах инструменнар буолаллар диэн тэрилтэҕэ ааҕаллар.

Саха Өрөспүүбүлүкэтин Ил Дарханын уонна  Бырабыыталыстыбатын пресс-сулууспата