Байыаннай дьайыы кыттыылаахтарыгар тиһиктээх мэдиссиинэ көмөтө оҥоһуллар

Байыаннай дьайыы инники кирбиитигэр сылдьар буойуттар төрөөбүт дойдуларыттан тэйиччи да сырытталлар, бүгүн Айсен Николаевы кытары кэпсэтии бириэмэтигэр биир дойдулаахтарын, Саха сирин олохтоохторун, видеонан эҕэрдэлээтилэр.

Кинилэргэ өрөспүүбүлүкэ баһылыга Айсен Николаев Саха сирин дьонун аатыттан эҕэрдэтин тиэртэ.

«Эһигини барыгытын саха норуотун аатыттан Саха Өрөспүүбүлүкэтин судаарыстыбаннаһын күнүнэн итиитик-истиҥник эҕэрдэлиибин! Эһиги Ийэ дойдубут көҥүлүн, тутулуга суох буолуутун туһугар билигин инники кирбиигэ сылдьар хорсун быһыыгытын сыаналыыбыт,» — диэтэ Ил Дархан.

Маны таһынан, Айсен Николаев байыаннай дьайыы кыттыылаахтарын өйүүр, көмөлөһөр бар дьонугар истиҥ махталын биллэрдэ, бу үлэ салҕанан бара туруоҕа диэн тоһоҕолоон эттэ. Ордук болҕомто мэдиссиинэ көмөтүгэр уонна социальнай реабилитацияҕа ууруллар. Анал байыаннай дьайыы кыттыылаахтара I группалаах инбэлиит буоллахтарына, протез оҥорторорго анаан «Госуслуги» портал нөҥүө электроннай сэртипикээт биэрэллэр, онуоха сайабылыанньата суох, 5 үлэ күнүн иһигэр быһаарыллар. Докумуоннары оҥорууга «Аҕа дойдуну көмүскээччилэр» судаарыстыбаннай пуонда Саха сиринээҕи салаата күүс-көмө буолар.

Реабилитацияны Өрөспүүбүлөкэтээҕи мэдиссиинэ чөлүгэр түһэрэр уонна успуорт мэдиссиинэтин киинигэр (Дьокуускайга уонна Аллараа Бэстээххэ Абалаахха), 1 №-дээх Өрөспүүбүлүкэтээҕи балыыһаҕа — Национальнай мэдиссиинэ киинигэр тэрийэллэр. Социальнай реабилитацияны Дьокуускайга, Нерюнгрига, Өлүөхүмэҕэ, Ньурбаҕа, ону тэҥэ Амма, Өлөөн, Орто Халыма улуустарын комплекснай кииннэригэр ааһаллар.

Москваҕа «Бэс Чагда» комплексыгар толору лиссиэнсийэлээх реабилитационнай киин арыллан үлэлиир. Онно когнитивнай уонна моторнай функциялары чөлүгэр түһэрэргэ SMP Esports профессиональнай автосимулятордары туһаналлар. Бу ньыма ордук уйулҕаларыгар охсууну ылбыт, массыынаны ыытыыттан куттанар буолбут буойуттарга туһалаах. Маннык автосимулятордар Дьокуускайдааҕы психологическай киин баазатыгар турар реабилитационнай кииҥҥэ эмиэ туттуллаллар. Оттон 3 №-дээх Өрөспүүбүлүкэтээҕи килиниичэскэй балыыһаҕа экзоскелет диэн саҥа технология туһаныллар, бу сүһүөхтэринэн хаампат буолбут дьон хаамар үөрүйэхтэрин түргэнник чөлүгэр түһэрэллэригэр көмөлөһөр.
Өрөспүүбүлүкэҕэ байыаннай дьайыы кыттыылаахтарыгар уонна кинилэр дьиэ кэргэттэригэр уйулҕа өттүнэн систиэмэлээх көмө эмиэ оҥоһуллар.