Байыаннай дьайыы кыттыылаахтарын оҕолоро үөрэх эйгэтигэр араас өйөбүлүнэн туһаналлар

Саха сиригэр байыаннай дьайыы кыттыылаахтарын 10,7 тыһыынча оҕото үөрэх эйгэтигэр араас өйөбүлүнэн туһанар. Өйөбүл миэрэлэр уһуйаан иитиллээччилэригэр, оскуола үөрэнээччилэригэр уонна устудьуоннарга көрүллэн, кинилэр үөрэнэллэригэр, сайдалларыгар табыгастаах усулуобуйаны хааччыйар. Бу туһунан Үөрэх уонна билим миниистирин солбуйааччы Степан Степанов иһитиннэрдэ.

«Үөрэх уонна билим министиэристибэтин хайысхатынан анал байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр 11 өйөбүл миэрэтэ көрүллэр. Быйыл бу өйөбүлүнэн байыаннай дьайыы кыттыылаахтарын дьиэ кэргэттэриттэн 10 694 оҕо хабылынна, ол иһигэр 2 571 уһуйаан иитиллээччитэ, 6 782 оскуола үөрэнээччитэ уонна 1 341 устудьуон», — диэн Степан Степанов эттэ.

Уһуйаан саастаах оҕолордоох дьиэ кэргэттэргэ сүрүн өйөбүлүнэн төрөппүт төлөбүрүттэн босхолонуу буолар. Бу өйөбүлүнэн 2 606 дьиэ кэргэн, ол иһигэр Дьокуускай чааһынай уһуйааннарыгар туһаннылар. Ону таһынан, 347 ыал оҕолорун олорор сирдэриттэн чугас баар уһуйааҥҥа көһөрөр быраабынан туһанна.

Оскуола үөрэнээччилэригэр боччумнаах өйөбүл көрүллэр. Анал байыаннай дьайыы кыттыылааҕын 5–11 кылааска үөрэнэр 4 248 оҕото босхо итии аһылыгынан хааччылынна. Ону таһынан, 373 ыал оҕотун олорор сириттэн чугас баар оскуолаҕа көһөрдө.

Эбии бөлөхтөргө (продленка) 610 оскуола үөрэнээччитэ киирдэ. Кинилэр төрөппүттэрэ эбэтэр сокуоннай бэрэстэбиитэллэрэ оҕону көрүү-истии иһин төлөбүртэн босхолоннулар. Итини таһынан, байыаннай дьайыы кыттыылаахтарын дьиэ кэргэттэриттэн 3 347 үөрэнээчи босхо куруһуоктарга, сиэксийэлэргэ уонна эбии уопсай үөрэхтээһин бырагыраамаларынан атын дьарыктарга сылдьар.

Оҕолор сынньалаҥнарын уонна доруобуйаларын бөҕөргөтүүнү тэрийии үлэтэ салҕанар. Доруобуйаны бөҕөргөтүүгэ сайыҥҥы  хампаанньа түмүктэммитин да кэнниттэн, сынньалаҥ тэрилтэлэригэр уонна санаторнай-курортнай эмтэниигэ путевканы ылар кыах баар.

«Доруобуйаны бөҕөргөтүүгэ сайыҥҥы хампаанньа түмүктэннэ, ол эрээри байыаннай дьайыы кыттыылаахтарын оҕолорун сынньалаҥ тэрилтэлэригэр уонна санаторнай-курортнай эмтэниигэ баралларыгар путевкалары биэрии үлэтэ салҕанар. Өйөбүл бу миэрэтинэн байыаннай дьайыы кыттыылааҕын 2 470 оҕото туһанна», — диэн миниистири солбуйааччы бэлиэтээтэ.

Өйөбүлү устудьуоннар эмиэ туһаналлар. Үрдүк уонна орто үөрэх кыһаларыгар тус сыаллаах үөрэтии дуогабарын түһэрсэр быраабынан 30 киһи туһанна.

Үрдүк үөрэх кыһаларын 611 уонна кэллиэс, техникум 888 устудьуонугар анал истипиэндьийэ олохтонно. Истипиэндьийэ кээмэйэ 6 940 солк. тэҥнэһэр уонна сыллата индексацияланар. Ону таһынан, өрөспүүбүлүкэ үөрэҕин тэрилтэлэригэр 18 байыаннай дьайыы кыттыылааҕа уонна байыаннай дьайыы кыттыылааҕын 42 кэргэнэ үөрэнэр.

Бу туһунан Ил Дархан уонна Бырабыыталыстыба пресс-сулууспата суруйар.