Байыаннай дьайыы зонатыгар гуманитарнай көмө саҥа баартыйатын ыыттылар

Саха Өрөспүүбүлүкэтин «Вместе к Победе!» хамыыһыйата Донбасска көмөлөһөр уонна өйүүр хотугулуу-илиҥҥи пуонданы, ону тэҥэ СӨ Быыһыыр сулууспатын кытта анал байыаннай дьайыы зонатыгар гуманитарнай көмө саҥа баартыйатын ыыттылар.

Ыытыллыбыт таһаҕас састаабыгар аадырыстаах баһыылкалар, ону тэҥэ баҕа өттүнэн үлэлиир тэрилтэлэр хомуйбут гуманитарнай көмө киирдилэр.

Хас биирдии маннык гуманитарнай көмөнү ыытыы – бу уопсай дьыалаҕа кылааты киллэрии уонна анал байыаннай дьайыы зонатыгар сылдьар дьону өйөөһүн буолар.

«Бүгүн Донбасска көмөлөһөр уонна өйүүр хотугулуу-илиҥҥи пуонданы уонна СӨ гражданскай оборонатыгар уонна нэһилиэнньэ олоҕор куттал суох буолуутун хааччыйар министиэристибэни кытта кыттыһан байыастарбытыгар волонтердар көмөлөрүн ыытан эрэбит. Элбэх көмө хомулунна. Волонтердар, байыастарбыт чугас дьонноро хомуйбут көмөлөрө уонна массыыналар. Көмөлөһөр дьоммутугар барыларыгар махтаныахпын баҕарабын. Гуманитарнай көмөнү массыынаҕа тиэйиигэ, таһыыга устудьуоннар көмөлөһө сылдьаллар. Төһө даҕаны уустук кэм үүннэр, көмө тохтообот, өссө эбиллэ, кэҥии турар. Уолаттарбыт көмө, тиэхиньикэ, дойдуларын аһын тутан олус астыналлар. Өссө даҕаны норуот түмсэн, хамсанан, көмөтө уҕараабакка, өссө даҕаны салҕанарыгар баҕарабын», — диэтэ СӨ СӨ ыччат дьыалаларыгар уонна социальнай коммуникацияларга миниистирэ Петр Шамаев.