Байыаннай дьайыыга өлбүт мобилизацияламмыт буойун уола суһал сулууспаттан босхолонно

Саха Өрөспүүбүлүкэтин Үрдүкү Суута муус устар 8 күнүгэр биир ураты дьыаланы көрөн баран, Нам оройуонун суутун быһаарыытын уларыппакка хаалларбытын,  байыаннай дьайыыга өлбүт буойун уолун суһал сулууспаҕа ыҥырыы сокуоннайа суоҕунан быһаарда.

Суукка Саха сиринээҕи суһал сулууспаҕа ыҥырыы хамыыһыйатыгар, Байыаннай комиссариакка, Горнай оройуонун сулууспаҕа ыҥырыы хамыыһыйатыгар, Горнай оройуонун Байыаннай комиссариатыгар эдэр киһи административнай ирдэбил түһэрбит.

Ол төрүөтүнэн, 2025 сыл атырдьах ыйыгар мобилизациянан байыаннай дьайыыга ыҥырыллан баран, дьоруойдуу өлбүт буойун уолун байыаннай сулууспаҕа сөптөөх диэн билинэннэр, военкомакка учуокка туруорбуттар. Манна даҕатан эттэххэ, кини полицияҕа үлэлии сылдьар уонна байыаннай сулууспаҕа ыҥырыыттан босхоломмут, ол эрээри Ыҥырыы хамыыһыйатын быһаарыыта көтүрүллэн, бэбиэскэ туттарыллыбыт. Эдэр киһи 2022 сыл балаҕан ыйыгар мобилизацияламмыт уонна 2025 сыл ыам ыйыгар аҕата байыаннай дьайыыга өлбүтүнэн сибээстээн, «Байыаннай эбээһинэс уонна байыаннай сулууспа туһунан» федеральнай сокуон 23 чааһын «б» пуунугар олоҕуран, байыаннай комиссар суһал байыаннай сулууспаҕа ыҥырыы туһунан быһаарыытын тохторго уонна босхолуурга көрдөһөр.

СӨ Байыаннай комиссариатын уонна СӨ Сулууспаҕа ыҥырыы хамыыһыйатын административнай бэрэстэбиитэлэ дьахтар суукка кэлбэтэх уонна байыаннай сулууспа эбээһинэһин толорууга аҕата (бииргэ төрөөбүт быраата) өлбүтүнэн босхолуур быраап байыаннай сулууспаҕа эбээһинэһин толоро сылдьан өлбүт байыаннай сулууспалаахтарга эрэ тарҕанарын быһааран туран утарыы суругун ыыппыт. Онно Байыаннай комиссариат бэрэстэбиитэлэ сууттаһааччы аҕата мобилизациянан ыҥырыллыбыт, онон бу ыйыллбыыт сокуон нуорматыгар хапсыбат диэн эппит.

Суут 2022 сыл балаҕан ыйыгар быстах мобилизациянан байыаннай дьайыыга ыҥырыллыбыт уонна 2025 сыл ыам ыйыгар анал бойобуой сорудаҕы толоро сылдьан өлбүт байыаннай сулууспалаах уола буоларын быһаарбыт.

Нам оройуонун суута СӨ Байыаннай комиссариатын уонна СӨ Сулууспаҕа ыҥырыы хамыыһыйатын административнай бэрэстэбиитэллэрин дакаастабылларын кытта сөбүлэспэтэх, утарсыы материальнай быраап нуормаларын сыыһа быһаарыыга олоҕурбутун ыйбыт. Суут уол аҕата хантараагынан буолбакка, мобилизациянан ыҥырыллан, байыаннай сулууспа эбээһинэһин толоро сылдьан өлбүтүн быһаарбыт. Онон сибээстээн «Байыаннай эбээһинэс уонна байыаннай сулууспа туһунан» сокуон 23 ыстатыйатын «б» пуунунан кини уола сулууспаҕа ыҥырыыттан босхолонор бырааптаах. Кини правовой статуһа мобилизацияҕа ыҥырыынан байыаннай сулууспалаах статуһугар тэҥнэһэр эбит.

Суут административнай ирдэбили кытта сөпсөһөн, байыаннай сулууспаҕа ыҥырыы сокуоннайа суоҕунан билинэн СӨ Сулууспаҕа ыҥырыы хамыыһыйатын быһаарыытын көтүрбүт.

СӨ аармыйаҕа ыҥырыытын хамыыһыйата бастакы инстанция суутун быһаарыытын сөпсөспөккө, апелляциялыыр үҥсүү түһэрбит, быһаарыыны көтүрэргэ турууласпыт. Кинилэр суутунан материальнай быраап нуормата кэһиллибитинэн аахпыттар.

Саха Өрөспүүбүлүкэтин Үрдүкү Суутун административнай дьыалаларга кэллиэгийэтэ Нам оройуонун суутун быһаарыыта сокуоннайын уонна кырдьыгын бигэргэтэн, апелляция үҥсүүтүн аккаастанна. Суут быһаарыыта сокуоннай күүһүгэр киирдэ.