Бастыҥ оһуокайдьыт оҕолору харчынан бириис күүтэр

Саха сиригэр оҕолорго аналлаах «Оһуокайдаан ойуохха — эһиэкэйдээн тэйиэххэ!» диэн өрөспүүбүлүкэтээҕи оһуокайдьыттар күрэхтэрэ саҕаланар. Тэрээһин Арассыыйа норуоттарын сомоҕолоһууларын уонна Саха сиригэр Култуура сылларын чэрчитинэн ыытыллар.

Күрэх балаһыанньатын СӨ Бырабыыталыстыбатын бэрэссэдээтэлин солбуйааччы Сергей Местников бигэргэттэ. СӨ Култуураҕа уонна духуобунай сайдыыга министиэристибэтэ иһитиннэрэринэн, күрэххэ 7-тэн 17-гэр диэри саастаах оскуола үөрэнээччилэрэ, оҕо ускуустубатын оскуолаларын уонна устуудьуйаларын иитиллээччилэрэ кыттыахтарын сөп. Кыттааччылар икки бөлөххө арахсаллар: 7–12 уонна 13–17 саастаахтар.

Күрэх хайдах ыытылларый?

Күрэх икки түһүмэҕинэн ыытыллар. Бастакы түһүмэх алтынньы 15 күнүттэн сэтинньи 15 күнүгэр диэри улуустарга буолуоҕа, маны култуура уонна үөрэх тэрилтэлэрэ иилээн-саҕалаан ыытыахтара. Иккис түһүмэххэ хас биирдии улуустан, саастарынан бөлөхтөртөн иккилии бастыҥ кыттааччы талыллан кэлиэҕэ. Түмүктүүр түһүмэх бу дьыл ахсынньы 11 күнүгэр Дьокуускай куоракка «Айыы кыhата» гимназияҕа буолара былааннанар.

Күрэх ирдэбилинэн, оһуокайдьыт 10-15 мүнүүтэ тулуурдаахтык туойуохтаах. Ону тэҥэ, «кынат» (оһуокайы өйөөччүлэр) кыттара биһирэнэр. Финалга хас биирдии бөлөхтөн 5-тии оҕо талыллан тахсар (уопсайа 10 финалист). Түмүктүүр туурга кыттааччылар сэрэбиэйинэн түбэспит тиэмэҕэ тутатына хоһуйан туойуохтара, манна бириэмэлэрэ 4 мүнүүтэнэн хааччахтанар.

Бириис төһөнүй?

Кыайыылаахтар дьупулуомнарынан уонна харчынан бириэмийэнэн наҕараадаланыахтара:

• 7-12 саастаахтарга: 1-кы үрдэллээх лауреат – 35 000 солк., 2-с үрдэллээх – 25 000 солк., 3-с үрдэллээх – 15 000 солк.
• 13-17 саастаахтарга: 1-кы үрдэллээх лауреат – 45 000 солк., 2-с үрдэллээх – 35 000 солк., 3-с үрдэллээх – 25 000 солк.

Бу тэрээһин оһуокай тылын-өһүн, үгэһин чөл хаалларарга, Арассыыйа норуоттарын сомоҕолоһууларын бөҕөргөтөргө туһаайыллар. Тэрийээччилэринэн СӨ Култуураҕа уонна духуобунай сайдыыга министиэристибэтэ, СӨ Үөрэххэ уонна билимҥэ министиэристибэтэ буолаллар. Тэрийии үлэтин Өрөспүүбүлүкэтээҕи норуот айымньытын уонна социальнай-култуурунай технологиялар дьиэлэрэ сүгэр.

Күрэх Ил Дархан «Саха Өрөспүүбүлүкэтигэр Оһуокай күнүн олохтуур туһунан» Ыйааҕын уонна судаарыстыбаннай тыллары сайыннарар бырагыраама чэрчитинэн ыытыллар.

Балаһыанньа толору тиэксин манна көрүөххэ сөп.

СӨ Ил Дарханын уонна Бырабыыталыстыбатын пресс-сулууспата.