Бэс ыйын 15 күнүттэн Арктика 14 улууһунан субсидиялаах таһыы саҕаланна

2026 сыл бэс ыйын 15 күнүттэн эрэгийиэннээҕи авиахампаанньалар Арктика 14 оройуонун икки ардыларыгар субсидиялаах рейстэри оҥорууну саҕалаатылар. Бу туһунан СӨ тырааныспарга министиэристибэтэ иһитиннэрэр.

Бэс ыйын 15 күнүгэр Баатаҕайтан, Үрүҥ Хайаттан, Эдьигээнтэн, Өлөөнтөн, Сааскылаахтан, Тиксииттэн, Уус Куйгаттан, Хонууттан Дьокуускайга диэри уонна төттөрү хайысханан субсидиялаах көтүүлэр саҕаланнылар.

Быһааран эттэххэ, чэпчэтиилээх билиэтинэн Арктика нэһилиэнньэлээх пууннарыгар олорор регистрациялаах дьон көтөр бырааптаахтар, онтон саҥа ирдэбилинэн Саха сирин олохтооҕун ID-нын (карта жителя цифровой удостоверениетын) көрдөрүү буолар. Бу дьаһал хоромньулаах туһаныыны суох оҥорорго уонна судаарыстыба өйөбүлүн аадырыстаан тиэрдиигэ туһуланар. Алта саастарыгар диэри саастаах оҕолор маннык карточканы көрдөрбөттөр.

Ону тэҥэ, биир киһи сылга айанныыр квотата олохтонно. Онно сөп түбэһиннэрэн, пассажир биирдэ барар уонна төннөр эрэ, эбэтэр биир хайысхаҕа икки билиэт оҥорторор бырааптаах.

Авиабилиэттэри «Полярные авиалинии» (polar-aero.ru) уонна «Якутия» (yakutia.aero) авиахампаанньалар официальнай саайтарыттан уонна каассаларыттан ылыахха сөп.

Субсидиялаах авиабилиэттэри оҥотторуу боппуруостарынан «Полярные авиалинии» АК-гар 8 800 100 59 59 уонна «Якутия» АК-гар 8 800 700 21 90 төлөпүөннэринэн билсиэххэ сөп.

Саха сирин карточкатын card.sakha.gov.ru порталга, ону тэҥэ Алмазэргиэнбанк офистарыгар оҥорторуохха сөп.

Саха сирин карточкатын эбэтэр «Юный житель Якутии» каартатын оҥотторууга консультациялары Алмазэргиэнбанк 8 800 100 34 22 нүөмэригэр эрийэн ылыаххытын сөп.