Бэс ыйыттан биэнсийэ кээмэйэ үрдүүр

Бэс ыйыгар биэнсийэлээхтэр сорох категорияларыгар төлөбүр кээмэйэ үрдүөҕэ. Биэнсийэ ыам ыйыгар 80 саастарын туолбут, бастакы группа инбэлиит буолбут, үлэттэн уурайбыт эбэтэр иитиллээччилэммит дьоҥҥо улаатыаҕа.

Бу туһунан Г.В. Плеханов аатынан Арассыыйатааҕы экэнэмиичэскэй университет судаарыстыбаннай уонна муниципальнай үп хаапыдыратын бэрэпиэссэрэ Юлия Финогенова иһитиннэрдэ.

«Бастакытынан, ыам ыйыгар 80 саастарын туолбут эбэтэр I группа инбэлиит буолбут гражданнарга страховой биэнсийэ  төлөбүрэ 19 169,38 солкуобайга диэри үрдүөҕэ. Бастакы группа инбэлииттэргэ ону таһынан көрүү-истии иһин 1 413,86 солкуобайга тэҥнэһэр эбии төлөбүр көрүллэр», — диэтэ Финогенова.

Кини этиитин РИА Новости бэчээттиир. Эспиэр бэлиэтииринэн, төлөбүрү үрдэтии биирдэ уонна биир эрэ төрүөтүнэн оҥоһуллар: холобур, киһиэхэ I группа инбэлиит буоларынан биэнсийэ номнуо анаммыт буоллаҕына, 80 сааһын туолуутугар эбии үрдэтии оҥоһуллубат.

Ыам ыйыгар үлэттэн уурайбыт үлэлиир биэнсийэлээхтэр эмиэ төлөбүрдэрэ үрдүүрүн күүтүөхтэрин сөп. Бары индексациялары учуоттаан үрдэтиллибит биэнсийэни, Социальнай пуонда  сөбүлэҥинэн, үлэттэн уурайбыт ый кэнниттэн кэлэр ый саҥатыгар төлүүллэр.

Маны таһынан, иитиллээччилэммит (холобур, 18 сааһыгар диэри оҕолор, 18-тан 23 саастарыгар диэри инбэлиит оҕолор, 18 сааһыгар диэри бииргэ төрөөбүттэр уонна сиэннэр) уонна Социальнай пуондаҕа сайабылыанньа биэрбит биэнсийэлээхтэр бэс ыйыттан эбии төлөбүрдэри ылыахтарын сөп. Маннык төлөбүр кээмэйэ хас биирдии иитиллээччи иһин (үс киһиттэн элбэҕэ суохха) биэнсийэҕэ эбии төлөбүр быһыытынан олохтонор. Финогенова бэлиэтииринэн, маннык төлөбүрү үлэлииллэриттэн-үлэлээбэттэриттэн тутулуга суох, икки биэнсийэлээх төрөппүт иккиэн ылыахтарын сөп.

Онон, бэс ыйыгар биэнсийэлээхтэр хас да категорияларыгар төлөбүр кээмэйэ үрдүөҕэ: олор ортолоругар ыам ыйыгар 80 сааһын туолбуттар, бастакы бөлөхтөөх инбэлиит буолбуттар, үлэттэн уурайбыттар эбэтэр иитиллээччилэммиттэр бааллар.

Санатан эттэххэ, ыам ыйыгар маннык үрдэтии муус устарга 80 саастарын туолбут гражданнарга, бастакы группа инбэлиит буолбуттарга, Аҕа дойду Улуу сэриитин кыттыылаахтарыгар уонна инбэлииттэргэ оҥоһуллубута.