Бэтэрээннэргэ уонна байыаннай дьайыы кыттыылаахтарыгар анаан “Идэтигэр бастыҥ”  куонкуруска сайаапканы ылыы уһатылынна

Бэтэрээннэргэ уонна байыаннай дьайыы кыттыылаахтарыгар анаан “Иккис старт” анал аакка “Идэтигэр бастыҥ” куонкуруска кыттарга сайаапканы ылыы ыам ыйын 27 күнүгэр диэри уһаата.

Ол туһунан, СӨ Нэһилиэнньэ дьарыктаах буолуутун киинин дириэктэрин солбуйааччы Айтал Керемясов иһитиннэрдэ.

Куонкурус сыала-соруга – ситиһиилээхтик үлэлиир, бэйэ дьыалатынан дьарыктанар эбэтэр идэлэринэн үлэлии сылдьар бэтэрээннэри уонна байыаннай дьайыы кыттыылаахтарын өйөөһүн буолар. Куонкуруска кыттааччы бэйэтин үлэтин, ситиһиилэрин кэпсиир, Саха сирин Бүтүн Арассыыйатааҕы таһымҥа көрдөрөр.

Ким кыттыан сөбүй?

Бойобуой дьайыылар бэтэрээннэрэ уонна 21-тэн үөһэ саастаах байыаннай дьайыы кыттыылаахтара. Официальнайдык үлэҕэ ылыллыбыт дьоннор, биирдиилээн урбаанньыттар уонна бэйэ дьыалалаахтар.

Сайаапканы хайдах биэриэххэ?

Куонкурус саайтыгар киирэҕит: konkurs.trudvsem.ru/luchshiy. “Иккис старт” анал ааты уонна эрэгийиэни — Саха Өрөспүүбүлүкэтин талаҕыт. Сайаапканы толороҕут, этиллибит докумуоннары сыһыараҕыт. Кыттааччы туһунан презентацияны эбэтэр видеоролигы эбии угуоххутун сөп. Докумуону биэрэргэ сүбэҕэ, көмөҕө наадыйар буоллаххытына, олорор сиргитинэн нэһилиэнньэ дьарыктаах буолуутун киинигэр тиийэҕит.

Сүбэ биэрэр хантаактар: 8 (4112) 507-801, 8 (4112) 507-802.

СӨ Ил Дарханын уонна СӨ Бырабыыталыстыбатын пресс-сулууспата.