Бөтүҥ оҕолоро плитка оҥороллор

Үөрэх үлэһиттэрин атырдьах ыйынааҕы мунньаҕын иитинэн, Дьокуускай куорат Орджоникидзе болуоссатыгар, биисинэһинэн дьарыктанар өрөспүүбүлүкэ оскуолаларын үөрэнээччилэрин быыстапката турда.  

Аныгы оҕолор оскуолаттан биисинэс туһунан өйдөбүллээх, номнуо сатабыллаах тахсаллар дииллэрэ оруннаах. Күн талбыт дьарыга барыта манна баар. Биир сонун сүүрээнинэн Нам улууһун Бөтүҥ оскуолатын ааттыам этэ.

Быыстапкалар турар эрээттэринэн хааман иһэн хараҕым кырыытынан остуолга бороҥ плиткалар сыталларын көрөн аһардым уонна салгыы атыллыахча буолан эрдэхпинэ, этэргэ дылы, атаҕым бэйэтэ тохтотто. Атыттар курдук туох даҕаны улахан ыҥырар-угуйар, өҥнөөх-дьүһүннээх, суруктара-бичиктэрэ суох. Арай остуолга икки бороҥ өҥнөөх плиткалар сыталлар уонна икки уол турар. Онтон салгыы оскуола араас бырайыактарын көрдөрөр истиэндэ турар.

Бу 10-с кылаас үөрэнээччилэрэ Андрей Лукин, Радмир Попов толкуйдаан олоххо киллэрбит бырайыактара эбит. “Бу плиткабыт бэрт судургутук сиэмэнтэн уонна кумахтан оҥоһуллар. Былырыыҥҥыттан дьарыктанан эрэбит. Оскуолабыт мастарыскыайыгар учууталбыт Стручков Федот Семенович салайыытынан уолаттар бэйэбит оҥоробут. Үс күн устата куурдабыт. Көрөргүт курдук плитка халыҥ, биэс сантиметрдаах. Халыҥ буолан ыйааһыны тулуйумтуо. Бэйэбит оскуолабыт тэлгэһэтигэр тэлгээн тургутан көрбүппүт. Билигин нэһилиэнньэттэн сыыйа сакаастар киирэн эрэллэр. Биир плитка ороскуота 152 солк. тэҥнэһэр, ыйааһына 5 киилэ”, – диэн кэпсииллэр.

Кэпсэтэн баран сонун сүүрээҥҥэ ылсан эрэллэр эбит диэн түмүккэ кэлэбин. Бөтүҥ оскуолата 73 үөрэнээччилээх эбит. Төһө даҕаны аҕыйах оҕолооҕун иһин, оскуола инженернэй-технологическай хайысханы тутуһан үлэлиир.  Уолаттар кэпсиир кэмнэригэр аттыларыгар саҥата суох турбут, суруналыыс үтэн-анньан көрөр араас ыйытыыларыгар биирдэ даҕаны быһа түһэн кинилэр оннуларыгар кэпсээн барбатах, оскуола тэрийээччи-педагога Вера Иванова: “Оҕолор “Школьное инициативное бюджетирование” диэн граны сүүйбүттэрэ. Нам улууһугар күөн күрэстэһии суох, оҥорон атыылыахха сөп эбит диэн түмүккэ кэлэн, дириэктэргэ киирэн этэн, былырыын тротуардарын ситэрбиттэрэ. Быйылгыттан атыынан дьарыктаныахтаахтар”, – диэн этэр.

Ааспыт үөрэх дьылыгар араас бырайыактыыр куонкурустары кэрийэн, плиткаларын туһунан кэпсээбиттэр, сырдаппыттар. “Ханна сылдьыбыт сирдэригэр барытыгар дьон сэҥээрэр” – диэн Вера Семеновна эбэн этэр.

Манна даҕатан эттэххэ, оскуола иһинэн хаһыс даҕаны сылын үлэ лааҕыра үлэлиир эбит. Оскуола инженернэй-технологическай хайысхалааҕын быһыытынан сатыбылга, быраактыкаҕа улахан болҕомтону уурабыт диэн биэс сыл устата тохтобула суох лааҕыр начаалынньыгынан үлэлээбит уопуттаах Вера Иванова этэр. “Оҕолор кыһын устата оҥорбут бырайыактарын олоххо киллэрэллэр” ,– диэн кэпсиир. Ол курдук, 11-с кылаас үөрэнээччилэрэ Евгений Захаров, Айаал Местников бырайыактарынан олохтоох көҕүлээһиннэри өйүүр бырагырааманан (ППМИ) нэһилиэккэ күргэ туппуттар. Аны биир хайҕаллааҕа диэн, нэһилиэнньэттэн оҕо былаһааккатыгар, бэсиэккэлэри оҥорорго тиийэ сайаапкалар киирэллэр эбит. Бу баара-суоҕа 73 үөрэнээччилээх оскуолаҕа! Бука, үөрэнээччи оскуолаттан үлэҕэ сатабыллаах, дьоҕурдаах тахсарыгар кэлэктиип бүүс-бүтүннүү үгүс сыратын ууран, кыһаллан эрдэҕэ. Аныгы курдук биисинэс, бэйэ дьарыга сайдар үйэтигэр саамай туһалаах хайысха буолар.