«Биир ньыгыл Арассыыйа» баартыйа сийиэһигэр IX ыҥырыылаах Госдуума дьокутааттарыгар хандьыдааттары туруордулар

Бэс ыйын 28 күнүгэр Москваҕа «Биир ньыгыл Арассыыйа» баартыйа XXIII сийиэһэ буолан ааста. Сийиэскэ Арассыыйа Бэрэсидьиэнэ Владимир Путин уонна «Биир ньыгыл Арассыыйа» баартыйа бэрэссэдээтэлэ Дмитрий Медведев кытыннылар.

Сийиэс үлэтигэр түөрт тыһыынчаттан тахса киһи – дэлэгээттэр уонна ыҥырыылаах ыалдьыттар кытыннылар. Дэлэгээттэр ортолоругар Саха сириттэн баартыйа бэрэстэбиитэллэрэ эмиэ кытыннылар. Дэлэгээссийэни «Биир ньыгыл Арассыыйа» баартыйа Саха сиринээҕи бэлитиичэскэй сэбиэтин Президиумун чилиэнэ уонна Ил Түмэн Судаарыстыбаннай мунньаҕын бэрэссэдээтэлэ Алексей Еремеев салайда.

Пленарнай мунньахха Владимир Путин кыттыыны ылла, «Биир ньыгыл Арассыыйа» баартыйа дойду уопсастыбаннай-бэлитиичэскэй олоҕор оруолун бэлиэтээтэ:

«Арассыыйа мэлдьи күүстээх, норуот сомоҕолоһуутунан кыайара. Чуолаан биһиги ис сомоҕолоһуубут куһаҕан санаалаахтарга сынньалаҥы биэрбэт. Кинилэр тугу да ситиһиэхтэрэ суоҕа, билигин да оннук буолуоҕа. Бүгүн биһиги норуоппут инники кирбиигэ сылдьар дьоруойдары өйүүр. «Биир ньыгыл Арасыыйа» ытык иэһэ – Кыайыы туһугар барытын оҥоруу», – диэн тоһоҕолоон бэлиэтээтэ Владимир Путин.

Дмитрий Медведев, баартыйа бэрэссэдээтэлэ, бэйэтин этиитигэр «Биир ньыгыл Арассыыйа» дьон итэҕэлин ыларга эрэ буолбакка, кинилэр интэриэстэригэр уонна дойдубут туһатыгар үлэни салгыырга дьулуһарын бэлиэтээтэ:

«Биир ньыгыл Арассыыйа» норуот бырагырааматын саамай уустук балаһыанньаҕа даҕаны тохтоппокко толорбута. Биһиги, улахан ыарахаттар баалларын да иһин, сайдыы биир да сүрүн хайысхатын тохтоппоппут. Норуот бырагыраамата – бу тыыннаах докумуон, биһиги ону уларыйыылары учуоттаан, дойдубутугар биллэриллибит улахан хааччахтааһыҥҥа сөптөөх хоруйу биэрэн, бэтэрээннэри, дьиэ кэргэттэри өйүүргэ өссө саҥа салааларынан байыттыбыт», – диэн санатта Дмитрий Медведев.

Маны сэргэ, баартыйа бэрэссэдээтэлэ «Биир ньыгыл Арассыыйа» саҥа норуот бырагырааматын соруктарын уонна приоритеттарын туһунан кэпсээтэ. Уруккутун курдук, бырагыраама олохтоохтор баҕа санааларыгар тирэҕириэҕэ. 2.0 норуот бырагырааматын оҥоруу салҕанар уонна атырдьах ыйыгар иккис түһүмэххэ бигэргэтиллиэҕэ. Оттон бу түһүмэххэ сийиэс федеральнай уонна биир мандааттаах уокруктарынан хандьыдааттары туруорда.

Саха сириттэн Арассыыйа Федерациятын Федеральнай Мунньаҕын тохсус ыҥырыылаах Судаарыстыбаннай Дууматын дьокутаатыгар хандьыдааттар испииһэктэригэр 1 №-дээх эрэгийиэннээҕи бөлөххө Галина Данчикова уонна Василий Егоров киирдилэр. Петр Шамаев 29 №-дээх Дьокуускайдааҕы биир мандааттаах быыбардыыр уокуругар хандьыдаат быһыытынан туруоруллубута.

«Биһиги Бэрэсидьиэммит Владимир Владимирович Путин уонна баартыйа бэрэссэдээтэлэ Дмитрий Анатольевич Медведев бэлиэтээбиттэрин курдук, баартыйа соруга – дьон санаатыгар тирэҕирэн, эрэгийиэммитин уонна бүтүн дойдубутун сайыннарыы, олохтоохтор интэриэстэрин өрө тутуу», – диэн бэлиэтээтэ «Биир ньыгыл Арассыыйа» баартыйа Саха сиринээҕи эрэгийиэннэҕи ситэриилээх кэмитиэтин салайааччыта Надежда Селютина.