«Биир ньыгыл Арассыыйа» оҕолоох дьиэ кэргэттэри өйүүр саҥа миэрэлэргэ этии киллэрдэ

Олор ортолоругар — төрүүргэ бэлэмнэнэр кииннэри тэрийии, оҕо көрөөччүлэргэ баҕа өттүнэн сертификацияны киллэрии уонна элбэх оҕолоох дьиэ кэргэттэргэ эбии материальнай көмөнү оҥоруу киирэр.

«Биир ньыгыл Арассыыйа» баартыйаҕа дьиэ кэргэни өйөөһүн — стратегическай хайысха, ону таһынан дойду баһылыга бэйэтин ыйааҕынан быһаарбыт сайдыы бастакы уочараттаах национальнай сыалларыттан биирдэстэрэ буолар диэн, баартыйа Бэрэссэдээтэлэ Дмитрий Медведев «Түмүк баар!» диэн төрдүс отчуоттуур-бырагыраамалыыр пуорум пленарнай мунньаҕар бэлиэтээбитэ.

Кини этэринэн, «Биир ньыгыл Арассыыйа» саҥа норуодунай бырагырааматыгар дьиэ кэргэттэри өйүүр социальнай эбээһинэстэр көстүөхтээхтэр — бу баартыйа дойду бүддьүөтүн кытта үлэтигэр саамай тутаах хайысханан буолар диэн кини бэлиэтээтэ.

Докумуоҥҥа элбэх оҕолоох дьиэ кэргэттэри өйүүр көҕүлээһиннэр эмиэ киириэхтэрэ — баартыйа этиитинэн сокуоҥҥа элбэх оҕолоох дьиэ кэргэн статуһа номнуо бигэргэтиллибитин баартыйа Бэрэссэдээтэлэ санатта.

«Өйөбүл дьаһалларын тирэҕэ оҥоһулунна, онно биһиги саҥа быһаарыылары эбэбит. Үһүс оҕолорун төрөппүт дьиэ кэргэттэр ипотекаларын сабарга бүддьүөттэн 450 тыһыынча солкуобайы ылар кыахтаахтар», — диэтэ Дмитрий Медведев.

Ону таһынан устудьуоннар уопсай дьиэлэригэр дьиэ кэргэн блоктарын тэрийэр суолталаах диэн баартыйа Бэрэссэдээтэлэ эттэ. Кини санаттарынан, «Биир ньыгыл Арассыыйа» көҕүлээһининэн ааспыт сылтан «устудьуон дьиэ кэргэнэ» статус бигэргэтиллибитэ — кинилэргэ федеральнай да таһымҥа, эрэгийиэннэргэ да туспа өйөбүл дьаһаллара оҥоһуллаллар.

«Оҕолоох устудьуон дьиэ кэргэттэригэр анал үөрэх кыраапыга үлэлиэхтээх. Билигин даҕаны дойду үрдүк үөрэҕин кыһаларыгар сүүһүнэн ийэ уонна оҕо хосторо тэрилиннэ, үксүлэригэр кэриэтэ баар. Бу ситими кэҥэтиэххэ наада», — диэн кини иһитиннэрдэ.

«Биир ньыгыл Арассыыйа» дьиэ кэргэни өйүүр эрэ буолбатах, бу Арассыыйа сайдыытын национальнай сыалларын кытта быһаччы сибээстээх стратегическай сорук буоларын эмиэ бигэргэтэр. Хас биирдии дьиэ кэргэн судаарыстыба дьиҥнээх көмөтүн билэрин туһугар, баартыйа миэрэлэр биир кэлим тиһигин оҥорор. Бу дьаһаллар оҕо төрүүрүн уонна иитиллэрин туһугар үчүгэй усулуобуйаны тэрийиигэ, дьиэ кэргэн институтун бөҕөргөтүүгэ уонна гражданнар олохторун хаачыстыбатын үрдэтиигэ туһаналлар. Дьиэ кэргэни өйөөһүн — бу Арассыыйа кэскилигэр, демографиятын уонна социальнай сайдыытыгар кылаат буолар», — диэн иһитиннэрдэ «Крепкая семья» баартыйа бырайыагын эрэгийиэннээҕи координатора Афанасий Постников. Бу туһунан «Биир ньыгыл Арассыыйа» Саха сиринээҕи салаата иһитиннэрэр.