Билиини-көрүүнү хаҥатар тэрээһиннэр, туһалаах маастар-кылаастар, истиҥ көрсүһүүлэр

Музейдар нэдиэлэлэрин дьон-сэргэ кэтэспитэ ыраатта. Тоҕо диэтэххэ, бу күннэргэ киһи өйүгэр-санаатыгар хатанан хаалар олус интэриэһинэй, ураты тэрээһиннэр ыытыллаллар. Быйылгы да тэрээһиннэр уратыларынан сөхтөрдүлэр, дьону-сэргэни үөртүлэр.

Дьокуускайга Ем.Ярославскай аатынан музей «Музейдар түүннэрэ» Бүтүн Арассыыйатааҕы аахсыйаҕа өрүү да буоларын курдук көхтөөхтүк кытынна.

Ол курдук, «В слове «мы» – сто тысяч «я» — Киһиэхэ – төрөөбүт сирэ, дойдута» бырагырааманы тэрээһиҥҥэ мустубут ыалдьыттар кэрэхсээтилэр. Бу дьоро киэһээ ыалдьыттар дириҥ историялаах, ураты үгэстэрдээх, ааспыт кэм ураты эйгэтигэр ыалдьыттаан ыллылар. Болҕомтону тардар ураты экспонаттары көрдүлэр, араас оонньууларга көхтөөхтүк кытыннылар, билиилэрин-көрүүлэрин тургутан көрдүлэр.

Уран тарбахтаах уустары кытта көрсүһүү, алтыһыы ураты буолла. Маны сэргэ, дьон-сэргэ биһирэбилин ылбыт ырыаһыт Варвара Степанова-Арчыынаны кытта тэҥҥэ астына-дуоһуйа оһуохайдаатылар, «Белые паруса» диэн оскуоланы араас сылларга бүтэрбит выпускниктар истиҥ көрсүһүүлэригэр сырыттылар. Ону иаһынан «Игры народов мира», «Дубель-шлюпка «Якуцкъ» билиини-көрүүнү хаҥатар бырагыраамаҕа сырыттылар, «От легенды и до мистики» экскурсия болҕомтолорун тарта.

Бу долгуйа кэтэспит ураты киэһээлэригэр музей саамай ураты экспонаттарын көрдүлэр, элбэх интэриэһинэйи иһиттилэр, биллиилээх этнограф Вильям Яковлевы-Түһүлгэни, режиссер Любовь Борисованы кытта көрсөн сэһэргэстилэр, туһалаах маастар-кылаастарга сырыттылар. Ирэ-хоро сэһэргэһэн, элбэҕи билэн-көрөн, астына-дуоһуйа сынньанан тарҕастылар. Маннык тэрээһиннэр музейдарга тиһиктээхтик ыытыллалларыгар баҕардылар. Бу туһунан Ем.Ярославскай аатынан музей пресс-сулууспата иһитиннэрдэ.

Хаартыскаларга Владимир Григорьев түһэриитэ