Болҕомтону тардыбыт бэлиэ тэрээһин

Суоттуга «Торҕо күөх дойдуга тулааһын буоллун!» диэн тэрээһин нэдиэлэ устата үрдүк таһымнаахтык ыытылынна.

Тэрээһин Арассыыйаҕа Норуоттар сомоҕолоһууларын, Саха сиригэр Култуура, Уус Алдан улууһугар Түмсүүлээх буолуу уонна бииргэ үлэлээһин, Суотту нэһилиэгэр Тыа хаһаайыстыбатын сайдыытын сылларынан, киэн туттар биир дойдулаахпыт, талааннаах бэйиэт, очеркист, публицист, П.А. Ойуунускай аатынан судаарыстыбаннай бириэмийэ лауреата Сергей Васильев-Борогонскай төрөөбүтэ 119 сылыгар ананна.

Ол курдук, С. Васильев-Борогонскай олоҕун, айар үлэтин сырдатар тематическай уруоктар ыытылыннылар. «Барыта оҕолор иһин» — бэйиэт үйэлээх айымньыларыгар «Кэрэ тыл кэрэһитэ» видеонан дьүһүйүү аахсыйата көхтөөхтүк ыытылынна. «Көмүс күһүн бэлэҕэ» тэрээһиҥҥэ — көҕөрдүү үлэтигэр мас олордуута, күһүҥҥү быыстапка-дьаарбаҥка болҕомтону тарта. Салгыы «Үйэлэри үрдүнэн үлдьү көтөн…» — бэйиэт бэлиэ сирдэригэр сүгүрүйүү, «Эриэккэс да дойдулаах эбиккин!» — С.Васильев-Борогонскай төрөөбүт күнүн бэлиэтээһин, ытык сир — Кыһыл Кырдал дьоллоох туонатыгар «Өлбөт өрөгөй ырыаһыта» быыстапка арыллыыта, С.Васильев-Борогонскай төрөппүт кыыһа Вера Сергеевна Васильева өйдөбүнньүк маһы уонна үүнэр көлүөнэҕэ кэс тылын туһаайыыта долгутуулаах түгэннэринэн буоллулар. Бэйиэт үйэлээх хоһооннорун доргуччу ааҕыылара сүргэни көтөхтө, сомоҕолоһуу оһуохай түһүлгэтин ситимнээтэ.

Суотту нэһилиэгин баһылыга В.П. Баишев, нэһилиэк бэтэрээннэрин сэбиэтин бэрэссэдээтэлэ Е.И. Свинобоева, «Түһүлгэ» СК сэбиэдиссэйэ Е.Н. Гоголева истиҥ эҕэрдэ тыллара, «Дьол туоната» нэһилиэк үс көлүөнэ эҕэрдэ кэнсиэрэ уҕараабат ытыс тыаһынан доҕуһуолланнылар.

С.Васильев-Борогонскайга үгэскэ кубулуйбут «Сэргэй көмүс күһүнэ» тэрээһиммит үрдүк таһымнаахтык түмүктэммитинэн бар дьоммутугар, тэрилтэлэрбит салайааччыларыгар махтанабыт.

Сүдү талааннаах биир дойдулаахпыт 2027 сыл үбүлүөйдээх сылыгар бары түмсэн, үйэтитэр үлэлэрбит үтүө түмүктэрдээх буолалларыгар эрэнэбит.

Е.Гоголева,

тэрийэр хамыыһыйа бэрэссэдээтэлэ.

Суотту, Уус Алдан.

Хаартыскалар Е.Гоголева тиксэриилэрэ