“Буойун” киин бэйэни көмүскэнэр ньымаларга үөрэтиэҕэ

“Буойун”/«ВОИН» байыаннай-спортивнай бэлэмнэнии эрэгийиэннээҕи киинэ уонна  бойобуой ускуустубалар Арассыыйатааҕы сойуустара (РСБИ) Саха сиригэр «Бэйэни көмүскэнии. I таһым» саҥа бырагыраамаларын саҕалаан эрэр.

Куурус 14-тэн 35-гэр диэри саастаах курсааннарга аналлаах. Бырагыраамаҕа киирэллэр:

• — баазовай тиэхиньиичэскэй элэмиэннэр;
• — киирсии ньымалара;
• — сэбилэниилээх утарсааччыны утары бэйэни көмүскэнэр ньымалар (кылгас уонна уһун мас, быһах, бэстилиэт уонна аптамаат);
• — үөрэтиллибит ньымаларынан иккиэ буолан дьарыктаныы.

РФ Бырабыыталыстыбатын бэрэссэдээтэлин солбуйааччы уонна «Буойун Киин кэтээн көрөр сэбиэтин бэрэссэдээтэлэ Юрий Трутнев тоһоҕолоон бэлиэтээтэ:

«Арассыыйа бэрэсидьиэнэ Владимир Путин сорудаҕынан тэриллибит Киин сыала-соруга – уолаттарбытын күүстээх-уохтаах оҥоруу, кинилэри кытта дойдубут эмиэ күүһүрэр. Ол гынан баран, саамай сүрүнэ — күүстээх буолуу эрэ буолбакка, Ийэ дойдуну таптыыр, Арассыыйанан киэн туттар, кини интэриэһин көмүскүүргэ бэлэм буолуу. Үөрэх эдэр дьоҥҥо интэриэһинэй буолуохтаах. Мин уолаттар харахтара чаҕылыйалларын көрдүм, хайдах курдук интэриэһиргээн Кииҥэ саҥаҕа үөрэнээри уонна биир сомоҕо хамаанда буолаары кэлэллэрин».

Бойобуой ускуустубалар Арассыыйатааҕы сойуустара быһаарбытынан, саҥа куурус — бэйэни көмүскэниигэ үөрэтэр систиэмэҕэ киирии таһым буолар. Салгыы үөрэх блогун төрдүс таһымҥа диэри кэҥэтэр былаан турар.

СӨ Ил Дарханын уонна СӨ Бырабыыталыстыбатын пресс-сулууспата.