«БУОЙУН» киин филиаллара дойду 24 эрэгийиэнигэр үлэлииллэр

«БУОЙУН» киин филиаллара дойду 24 эрэгийиэнигэр үлэлииллэр.

«БУОЙУН» кииҥҥэ Херсонщинаттан Камчааткаҕа диэри 165 тыһыынчаттан тахса курсаан үөрэннэ. Киин географията салгыы кэҥиир, дойду 24 эрэгийиэнин хабар. Уһук Илиҥҥи федеральнай уокурукка кииҥҥэ 43 тыһыынча кэриҥэ курсаан үөрэммит. Бу туһунан РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ, «БУОЙУН» киин кэтээн көрөр сэбиэтин бэрэссэдээтэлэ Юрий Трутнев Магадааҥҥа Таалай бөһүөлэгэр Уһук Илиҥҥи федеральнай уокурук сэбиэтин мунньаҕар иһитиннэрдэ.

—«БУОЙУН» киин бигэтик, труктаахтык үлэлиир. Инструктордар үчүгэй састааптара талыллыбыт. Киин курсааннара астыналлар, киэн тутталлар. Саамай сүрүн сыала-соруга — оҕолор дойдуларыгар бэриниилээх буола улааталлар, көмүскүүргэ бэлэмнэр. Ол улахан суолталаах. Итиэннэ патриотическай иитиигэ үлэни губернатордара суох оҥорор кыаллыбат. Биһиэхэ бүгүн Уһук Илиҥҥэ киин сэттэ филиала үлэлиир. Сотору аҕыс буолуо. Мин эрэгийиэннэр баһылыктарыттан киин филиалларын кытта үлэҕэ болҕомто ууралларыгар көрдөспүтүм. Онно тиийиэххэ, оҕолору, инструктордары кытта алтыһыахха, кэпсэтиэххэ наада. Оччоҕуна барыта сөпкө тэриллэр, — диэн этэр Юрий Трутнев.

«БУОЙУН» киин Саха сиринээҕи филиала 2024 сыллаахха тэриллибитэ уонна икки сыл иһигэр түөрт тыһыынчаттан тахса курсааны бэлэмнээтэ, ол иһигэр 900-тэн тахса доброволец уонна контрактник.

Ил Дархан Айсен Николаев эрэгийиэннэргэ киин филиалларын арыйыы, ыччат байыаннай-патриотическай бэлэмнэниитин сайыннарыыга көмөлөһөрүн тоһоҕолоон бэлиэтээбитэ. Саха сиринээҕи филиалга 40-тан тахса үөрэх бырагыраамата олоххо киирэр, онтон уһуйааччыларын ортолоругар бойобуой уопуттаах дьон, байыаннай дьайыы кыттыылаахтара бааллар.

2026 сыллаахха «Эдэр дьоруойдар кэмнэрэ» диэн сайыҥҥы байыаннай-патриотическай симиэнэлэргэ Арассыыйа 55 эрэгийиэниттэн 13 тыһыынча улаатан эрэр оҕо кыттыбыта. Уһук Илиҥҥэ, Приморье кыраайын уонна Амур уобалаһын саҥа филиалларын киллэрэн туран, 3500 тахса курсаан бэлэмнэниини ааспыт.

Сезон хабыытынан бэлиэ буолла: 100 кэриҥэ профильнай симиэнэ түмүктэннэ. Волгоград уобалаһыгар эрэгийиэннэр икки ардыларынааҕы уонна Арассыыйатааҕы симиэнэлэргэ ДНӨ, ЛНӨ, Запорожскай уонна Херсон уобаластарыттан оҕолор кыттыбыттара. Киин маны таһынан «Смена», «Океан» уонна «Орленок» Арассыыйатааҕы оҕо кииннэрин кытта бииргэ үлэлээһини эмиэ кэҥэттэ, ол баазатыгар 500 кэриҥэ курсаан үөрэннэ.

Бүтүн Арассыыйатааҕы «Плечом к плечу» куурус иккис сезона саҕаланна: бары филиаллартан 1000 тахса курсаан 32 нэдиэлэ устата социальнай туһалаах көҕүлээһиннэри олоххо киллэриэхтэрэ — гуманитарнай көмөнү хомуйуохтара, оскуола иннинээҕи саастаах оҕолорго дьарык ыытыахтара, үлэ, тыыл бэтэрээннэригэр көмөлөһүөхтэрэ, байыатар көмүс уҥуохтара көтөҕүллүбүт сирдэрин көрүөхтэрэ, өрө тардыахтара. Ону таһынан, РФ култуура министиэристибэтин кытта тэриллибит «БУОЙУН.Киинэ» бырайыак чэрчитинэн, 350 тахса киинэ көрдөрүллүбүт, ону 48 тыһыынчаттан тахса киһи көрбүт, онтон сорох курсааннар Алексей Чадов «Амурское чудо» хартыынатын устууга кыттыахтара.

Санатан эттэххэ, киин РФ Бэрэсидьиэнэ Владимир Путин сорудаҕынан 2022 сыллаахха ахсынньы 1 күнүгэр тэриллибитэ. Соруга — төрөөбүт дойдуну таптыыр, көмүскүүр патриоттар саҥа көлүөнэлэрин бэлэмнээһин. Оскуолалар, техникумнар, кэллисэтэр уонна үрдүк үөрэх кыһаларын баазаларыгар уруогу таһынан 50-тан тахса үөрэх бырагыраамата олоххо киирэр: бастакы көмөгү оҥоруу уонна тактическай мэдиссиинэ, пилота суох систиэмэлэри туттуу уонна снайпинг. Курсааннары 500 кэриҥэ инструктор, ол иһигэр РФ бойобуой снайпиҥҥа федерацията үөрэтэллэр. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Хаартыска: Уһук Илиҥҥэ боломуочуйалаах бэрэстэбиитэл аппараатын пресс-сулууспатыттан

Сиһилии: https://www.sakha.gov.ru/news/64795