Бүгүн эмиэ магнитнай буурҕа түһэр

Бүгүн, кулун тутар 19 күнүгэр, эмиэ күүстээх магнитнай буурҕа түһэр диэн Күн астрономиятын лабораторията иһитиннэрэр. 

Кулун тутар 16 күнүгэр Күҥҥэ улахан эстии буолбута. Ол плазмата 60-ча чааһынан Сиргэ тиийэн кэлэр. Түргэнэ — 670 км/сөк. Учуонайдар плазма төһө түргэннээҕин суоттаан баран, Москва бириэмэтинэн, сарсыарда 4-6 чааска кэлиэ диэн сабаҕалаабыттар. Ол аата, Дьокуускай бириэмэтинэн, сарсыарда 10-12 чааска саҕаламмыт.

Бу кэмҥэ магнитнай буурҕа күүһэ G3 таһымҥа тиийиэҕэ (күүстээх буурҕа). Муҥутуур таһым — G5, бу сэдэхтик буолар.

Бу кэннэ уонча чаас Сир магнитнай көмүскэлин хамсатан баран, буурҕа бүтүөҕэ.

Күҥҥэ эстии ортотугар, Сир диэки хайыспыт өттүгэр тахсыбыт, онон плазма былытыттан куотар кыах суох. Сороҕор кытыытыгар эстибит буоллаҕына, Сир аттынан мүлчү көтөн, ааһа турааччы.

Онон бүгүн киэһэ эмиэ дьүкээбиллэр суһумнуур буолуохтаахтар. Киэһээҥҥэ диэри бүтэрэ дуу? Магнитнай буурҕаны тулуйбат дьон, бүгүн сэрэхтээх, доруобуйаҕытыгар болҕомтолоох буолуҥ.