Бүгүн эрэннэриллибит магнитнай буурҕа буолбата

Космическай чинчийии институтун Күн астрономиятын лабораторията иһитиннэрэринэн, балаҕан ыйын 24 күнүгэр магнитнай буурҕа суох. Чэ, үөһэ тыынабыт.

Бу иннинэ чэппиэргэ орто күүстээх магнитнай буурҕа түһүөҕэ диэн сабаҕалааһын баар этэ. Тоҕо диэтэр, бу иннинэ Күҥҥэ эстии тахсан, коронарнай хайаҕас үөскээбитин суруйбуттара. Хата, плазма «тыала» Сири таарыйбакка ааста бадахтаах.

Бу ыйга Күн эстиитэ аҕыйах. Бэл диэтэр, балаҕан ыйын 13 күнүттэн 19 күнүгэр диэри тохтобул буолар сылдьыбыта — ол эбэтэр, бу кэмҥэ биир да эстии буолбатаҕа. Астрономнар бу маны дьикти көстүү диэн бэлиэтээбиттэрэ. Тоҕо диэтэр, кэниики сылларга Күн олус актыыбынай, күннэтэ эстиилэр буола тураллар.

Балаҕан ыйыгар биирдэ эрэ магнитнай буурҕа буолбута — балаҕан ыйын 8 күнүгэр мөлтөх соҕус магнитнай буурҕа G1 индекскэ тиийбитэ.

Астрономнар сабаҕалыылларынан, бу ый бүтүөр диэри космическай күн-дьыл туруга улахан эстиитэ, буурҕата суох, бигэ туруктаах буолуоҕа.