Бүгүн — салгын киртийиитэ, хаар уонна буурҕа

Бүгүн, алтынньы 26 күнүгэр, Саха сирин оройуоннарынан хаардыыр, Арктика улуустарыгар буурҕа түһэр, оттон сорох сирдэринэн салгын киртийэр куттала баар. 

Ол курдук,  бүгүн түүн уонна сарсыарда Дьааҥы  улууһугар мөкү метеорологическай усулуобуйа үөскүүрэ күүтүллэр. Бу айылҕа көстүүтэ салгыҥҥа буортулаах эттиктэр тарҕаммакка, мунньулалларыгар тириэрдэр. Онон олохтоохторго сэрэхтээх буолуохтарын, таһырдьа уһуннук сылдьалларын хааччахтыылларын сүбэлииллэр.

Саха сирин үгүс оройуоннарынан кыралаан, сорох сирдэринэн күүстээх хаар түһүөҕэ. Тыала орто күүстээх, ол эрээри өрөспүүбүлүкэ соҕуруулуу-арҕаа өттүгэр тыал түргэнэ сөкүүндэҕэ 9-14 миэтэрэҕэ диэри күүһүрүө. Оттон Арктика улуустарыгар сөкүүндэҕэ 15-20 миэтэрэҕэ тиийэ тыаллаах, хаардаах буурҕа түһүөҕэ. Суолга-иискэ сылдьар дьон сэрэхтээх буолуҥ.

Салгын температурата

• Түүнүн: -10…-15° тымныы, халлаан былыта суох буоллаҕына -15…-20° буолуо. Соҕуруулуу-арҕаа уонна соҕуруу -5…-10°, хотугу-илин, хотугу-арҕаа -22…-27° тымныйыа. Оттон намыһах сирдэринэн температура -30…-35° диэри түһүөҕэ.
• Күнүһүн: -5…-10° көрдөрүө. Соҕуруулуу-арҕаа уонна соҕуруу сылыйан 0…-5° буолуо, оттон хотугу-илин улуустарга -15…-20° тымныы олохсуйуо.

Дьокуускай куоракка  кыралаан хаар түһэрэ сабаҕаланар. Арҕааттан сөкүүндэҕэ 1-6 миэтэрэ түргэннээх сымнаҕас тыаллаах. Түүнүн салгын температурата -11…-13° тымныы, оттон күнүһүн халлаан -6…-8° көрдөрүө.