Бүгүҥҥүттэн Өлүөнэ эбэҕэ теплоходтар үлэҕэ таҕыстылар

«Лена-Транс» хампаанньа Дьокуускай – Аллараа Бэстээх хайысханан дьону таһыы саҕаламмытын туһунан иһитиннэрдэ. Бүгүҥҥүттэн маршрутка бастакынан «Московский-11» теплоход үлэҕэ таҕыста.

Бэлиэтээн эттэххэ,  маршрутка үксүн икки теплоход үлэлиир: «В. Рукавишников» уонна «Московский-11». Кинилэргэ айан сыаната катеры кытта тэҥнээтэххэ икки төгүл чэпчэки буолар. Теплоходтар ордук табыгастаахтар, куттал суох буолуутун өттүнэн эрэллээхтэр, ол гынан баран, арыый бытааннар.

Бастаан маршрут 27-с чыыһылаҕа аһыллыахтааҕа, ол эрээри сарсыныгар көһөрүллүбүтэ. Санатар буоллахха, былырыын эмиэ ыам ыйын 28 күнүгэр аһыллыбыта.

Саҥа уларыйыынан Дьокуускайтан айанныыр сирэ уларыйда. Өскөтүн урут бу икки теплоход өрүс пуордун үһүс причалыттан сылдьар эбит буоллахтарына, быйыл Ларионов уул., 16В аадырыһынан турар «Намыв» саҥа станциятыттан айанныыр буоллулар.

Сырыы араспысаанньата:

• Дьокуускайтан («Намыв» ст., Ларионов уул., 16В): 09:00; 14:00; 18:30.
• Аллараа Бэстээхтэн (Пристанскай уул., 33а / Тимир суол вокзалын кэтэһэр саалата): 11:00; 16:00; 19:30.

Айан сыаната уонна чэпчэтиилэр

Айан сыаната – 250 солкуобай. 5 саастарыгар диэри оҕолорго – босхо, оттон 5-тэн 10 саастарыгар диэри оҕолорго – сыана аҥаара.

Сиһилии информацияны 8 924 595 14 14 төлөпүөнүнэн эбэтэр 89245951414@mail.ru электроннай почтанан ыйыталаһыаххытын сөп.