Национальнай бырайыагынан 100 км кэриҥэ массыына суолун оҥоруохтара

2026 сылга Саха сиригэр дойду Бэрэсидьиэнэ Владимир Путин көҕүлээбит «Инфраструктура для жизни» национальнай бырайыагынан 94,6 км суолу нуормаҕа эппиэттиир гына оҥоруохтара. Ол иһигэр 75 км — өрөспүүбүлүкэ суолталаах, 6,9 км — Дьокуускай куорат агломерациятыгар чугас суолталаах олохтоох суол. Өссө 20 тыһ. тахса нэһилиэнньэлээх кыра агломерацияларга 12,5 км суол саҥардыллыаҕа. Билиҥҥи туругунан 28,6 км суол нуормаҕа эппиэттиир гына оҥоһуллубутун туһунан СӨ тырааныспар уонна суол хаһаайыстыбатын министиэристибэтэ иһитиннэрэр. Бу туһунан Ил Дархан уонна Бырабыыталыстыба пресс-сулууспата суруйар.

Ол курдук, Дьокуускай куоракка Арассыыйаҕа биир бөдөҥ, оҕолорго аналлаах Адаптивнай үөрэхтээһин комплексыгар киирии суолга аспааллааһын үлэтэ түмүктэннэ. Сэргэлээх шоссеттан үөрэх комплексыгар диэри 0,2 км усталаах учаастакка хапытаалынай өрөмүөн чэрчитинэн суол үлэһиттэрэ олоҕун бэлэмнээтилэр, айанныыр чааһын аспааллаатылар уонна тротуар оҥордулар.

Ленскэй куоракка Дзержинскэй уулуссаҕа— Пролетарскайтан Якутскай уулуссаҕа диэри 0,2 км усталаах суол учаастагар хапытаалынай өрөмүөн түмүктэннэ. Үлэһиттэр олоҕун бэлэмнээтилэр уонна икки араҥалаах аспаал-бетон уурдулар, сатыы дьон куттала суох сылдьарын туһугар саҥа тротуар зонатын оҥордулар. Эбийиэги үлэҕэ киллэрэргэ бэлэмнииллэр. «Дзержинскай уулуссаҕа урут суох тротуары оҥордулар. Сатыы сылдьар сиргэ тротуар билиитэтин уурдулар, оттон айанныыр чааска сыстар сирдэргэ табыгастаах сыырынньары түһэр суолу оҥордулар. Кэлээскэлээх күүлэйдиир олус табыгастаах буолла», — диэн Ленскэй олохтооҕо Анна кэпсээтэ.

Итини таһынан, Кангаласка диэри барар 6,6 км  суолга хапытаалынай өрөмүөн түмүктэннэ. Бу трасса өрөспүүбүлүкэ тирэх суол чааһынан буолар, ону таһынан чох карьерыгар уонна «Кангалассы» индустриальнай пааркаҕа тырааныспар тиийэрин хааччыйар. Маны таһынан, бу сынньанарга аналлаах сир – Лена өрүс көстүүлээх «Кангаласский мыс» көрөр былаһааккаҕа айанныыр суол. Ону таһынан сырдатар ситими, тротуардары уонна уопсастыбаннай тырааныспары кэтэһэр павильоннары оҥордулар. Санатан эттэххэ, былырыын Кангаласка диэри 6 км суолга хапытаалынай өрөмүөн барбыта. Билигин 12,6 км суол нуормаҕа эппиэттиир турукка киирдэ. Ааспыт сыл түмүгүнэн национальнай бырайыак иитинэн Саха сиригэр 130 км тахса массыына суолун үлэҕэ киллэрбиттэрэ, ол иһигэр 109 км кэриҥэ өрөспүүбүлүкэ суолун.