Бүлүү улууһугар Халбаакы нэһилиэгин дьокутааттарын быыбара буола турар
Бүлүү улууһун Халбаакы нэһилиэгэр олохтоох Сэбиэт дьокутааттарын эбии быыбара саҕаланна. Сарсыарда 10:00 чаастааҕы туругунан, быыбардааччылар испииһэктэригэр киирбит дьонтон 9,07 %-на куоластаата.
Куоластааһын «Тускул» норуот айымньытын дьиэтигэр тэриллибит 169 №-дээх быыбардыыр учаастакка (УИК) ааһар. Быыбардыыр уокурукка уопсайа 474 быыбардааччы баар.
Хас биирдии быыбардааччы элбэх мандааттаах уокурукка биир бүлүтүөнү ылар. Испииһэккэ 7 хандьыдаат аата киирбитинэн, онтон иккитэ бэйэлэрин туруоруммут дьон, оттон биэһэ — «Биир ньыгыл Арассыыйа» баартыйаттан туруоруллубуттар.
Учаастактааҕы хамыыһыйаны Маргарита Софронова салайар. Оттон ГАС «Выборы» систиэмэ үлэтин уонна быыбар хаамыытын Бүлүүтээҕи быыбардыыр хамыыһыйатын (ТИК) бэрэссэдээтэлин солбуйааччыта, сисадмин Егор Рожин хонтуруоллуур.
Быыбар сокуонун тутуһуллуутун, аһаҕас уонна кырдьыктаах буолуутун Саха сиринээҕи Уопсастыбаннай балаататтан анаммыт уопсастыбаннай кэтээн көрөөччү Анна Михайлова көрөр-истэр.
Ытык-мааны дьон, үлэ бэтэрээннэрэ быыбарга көхтөөхтүк кыттан, биир дойдулаахтарыгар үтүө холобур буолаллар:
- Михаил Васильевич Былахыров — нэһилиэк бочуоттаах олохтооҕо, Саха Өрөспүүбүлүкэтин тыатын хаһаайыстыбатын туйгуна. Кини быыбарга мэлдьи улахан эппиэтинэстээхтик сыһыаннаһар. Бүгүн эмиэ быыбардыыр учаастакка кэлэн бэйэтин гражданскай иэһин толордо.
- Люция Гаврильевна Шамаева — «Гражданскай килбиэн» ураты бэлиэ хаһаайката, өрөспүүбүлүкэ үөрэҕириитин систиэмэтин бочуоттаах бэтэрээнэ. Кини маҥнайгынан кэлэн куоластаата. Люция Гаврильевна Халбаакы оскуолатыгар нуучча тылын уонна литэрэтиирэтин учууталынан, пионер-баһаатайынан, иитии үлэтигэр дириэктэри солбуйааччынан, оскуола бибилитиэкэринэн уонна түмэл үлэһитинэн уһун сылларга айымньылаахтык үлэлээбитэ.
Сообщить об опечатке
Текст, который будет отправлен нашим редакторам: