Бүлүү улууһун Сатаҕайыгар баһаар кэннэ эр киһи өлүгэ булуллубут

Саха сирин борокуратуурата иһитиннэрэринэн, баһаар тахсыбыта Бүлүү улууһун Сатаҕай нэһилиэгэр бэлиэтэммит. Манна Центральнай уулуссаҕа турар чааһынай мас дьиэҕэ соһуччу уот турбут.

Баһаарынайдар суһаллык тиийэн уоту умулларбыттарын кэннэ, уот турбут сирин көрүү-истии кэмигэр дьиэ иһиттэн 1965 с.т. эр киһи өлүгэ булуллубут.

Билиҥҥи туругунан, баһаар төрүөтэ быһаарылла илик. Исписэлиистэр уонна быраабы араҥаччылыыр уорганнар баһаар турбут төрүөтүн үөрэтэллэр.

Санаттахха, күһүҥҥү тымныылар саҕаланан, дьон дьиэтин оттунар кэмигэр баһаар тахсар куттала биллэрдик улаатар. Онон, олохтоохторго уот ситимин, оһоҕу уонна ититэр тэриллэри сэрэхтээхтик туһаналларыгар санатабыт.