Бүлүүгэ байыаннай дьайыы бэтэрээннэрэ Хорсун быһыы уруоктарын ыыттылар

Бүлүүтээҕи 2 №-дээх орто оскуолаҕа байыаннай дьайыы бэтэрээннэрэ Октябрина Афанасьева уонна Айтал Никитин «Аармыйаҕа биир күн» бырайыак чэрчитинэн байыаннай үөрэх хомуурун кыттыылаахтарыгар Хорсун быһыы уруоктарын ыыттылар. Тэрээһин «Аҕа дойду көмүскээччилэрэ» судаарыстыбаннай пуонда филиалын социальнай координатордарын көмөтүнэн тэрилиннэ.

Уруок кэмигэр бэтэрээннэр үөрэнээччилэри кытта байыаннай сулууспа күннээҕи олоҕун туһунан санааларын үллэһиннилэр, Аҕа дойдуну көмүскээччилэригэр тулуур уонна хорсун санаа улахан суолталааҕын бэлиэтээтилэр. Кинилэр саллаат олоҕун-дьаһаҕын хайдах тэринэрин, бэрээдэк, бастакы мэдиссиинэ көмөтүн оҥорор сатабыл уонна эт-хаан өттүнэн бэлэмнээх буолуу наадалааҕын быһаардылар.

Мэдиссиинэ көмөтүгэр бэлэмнэниигэ ураты болҕомто уурулунна, бу туһунан Октябрина Афанасьева кэпсээтэ. Кини байыаннай дьайыылар буолар сирдэригэр сиэстэрэнэн үлэлээбит уопутун үллэһиннэ. Онно кини тулуура уонна мындыра бааһырбыт саллааттар тыыннарын биирдэ эрэ буолбакка, хаста да быыһаабыт.

«Бу хомуур кэмигэр тугу билбиккит-көрбүккүт үксэ аармыйаҕа сулууспалыыргытыгар уонна ыарахаттары туоруургутугар олук буолуоҕа», — диэн бэлиэтээтилэр бэтэрээннэр.

Тэрээһин биир чаҕылхай түгэнинэн үөрэнээччилэр Арассыыйа Дьоруойа Филипп Евсеевтиин көрсүһүүлэрэ буолла.

«Аармыйаҕа биир күн» бырайыак сүрүн сыала — уолаттары РФ Сэбилэниилээх Күүстэригэр сулууспалыырга уонна Аҕа дойдуну көмүскүүргэ бэлэмнээһин. Байыаннай үөрэх  хомуура 7-11 кылаас 38 үөрэнээччитигэр ыытылынна. Бу тэрээһин оҕолорго инникитин сулууспалыылларыгар наадалаах сүрүн билиини уонна сатабылы ылалларыгар кыах биэрдэ.