«Чэбдиктэн» чэбдигирэн

Тоҕус уонус сылларга «Востоктехмонтаж» АУо  (сал.Борисов Спартак Степанович), Саха Өрөспүүбүлүкэтин Идэлэх сойуустарын федерациятын (сал.Сосин Спиридон Спиридонович), эрэгийиэннээҕи отделение социальнай страхование пуондатын (сал.Лейзёрзон Эдуард Борисович) кыһамньыларынан «Чэбдик» сонотуоруй-профилакторий аһыллыбыт эбит.

Быйыл балаҕан ыйыгар 35 сылларын бэлиэтээбиттэр. Бастакы кылаабынай бырааһынан Селивестрова Татьяна Владимировна үлэлээбит. Бары бастакы саҕалааһын үлэтин кини салайыытынан саҕалаабыттар. Дьокуускай куораттан наһаа ырааҕа суох, Чочур Мыраан анныгар, бэс чагда быыһыгар олус кэрэ көстүүлээх сиргэ сонотуоруй билиҥҥи кэмҥэ сөп түбэһэр араас мэдиссиинэ оборудованиенан хааччыллан сынньанааччылары эмтиир, доруобуйаларын чөлүгэр түһэрэргэ көмөлөһөр үлэһиттэринэн толору хааччыллан үлэлии-хамсыы олороллор эбит. Чэбдик диэн аатыгар сөп түбэһиннэрэн сынньана кэлбит дьон-сэргэ манна сытан уопсай туруктарын чэбдигирдэллэригэр бары кыһамньы уураллара харахха тута быраҕыллар. Билигин кылаабынай бырааһынан Чеботарева Евгения Владимировна үлэлиир.

Урукку өттүгэр хаһан да сонотуоруйга сылдьыбатах киһи мин эдьиийбин 70 сааһын туолбутунан бэлэх курдук сынньатар былааннаах кэлэн астына сынньанан, араас процедураларга сылдьан астынныбыт. Бырааспыт Светлана Алексеевна Шестакова курортнай каартабытыгар суруллубут диагноспытынан көрөн араас процедуралары анаата.

«Чэбдиккэ» кэлбит дьон ЛФК-тан, массаастан саҕалаан, фитобарга, ингаляторийга ,физиотерапияҕа, сухой углекислай ваннаҕа, теплолечениеҕа, спирографияҕа, барокамераҕа, светолечениеҕа(биоптрон), хвойная ваннаҕа, галотерапияҕа (туустаах хос), подводный душ диэннэргэ процедуралары күн аайы туһаналлар.

Биһиги сонотуоруй үбүлүөйүгэр сөп түбэспит «золотой заезд» аатырдыбыт, эбиитин саастаахтар декадаларыгар түбэһэммит иллэҥ кэммитин туһалаахтык атаарарбытыгар ис сүрэҕиттэн кыһаллан үлэлиир Ананьева Надежда Николаевна күн аайы араас көрсүһүүлэри тэрийдэ.

Ол курдук, саҥа киирбиттэри бэйэ-бэйэлэрин кытта билиһиннэриитэн саҕалаан күн аайы бииртэн биир сэргэх тэрээһиннэр ыытылыннылар. Атласовтар уһаайбаларыгар экскурсия, «Үөрүү сыдьаайа» диэн үһүс көлүөнэ ырыа ансаамбылын, Белинскэй аатынан бибилэтиэкэ үлэһитэ Ольга Заболоцкая «Саастаах дьоҥҥо доруобуйаны көрүнүү»диэн бэсиэдэтин, викторинатын астына иһиттибит.

Полина Победаны кытта билсиһии биэчэригэр Полина Пантелеймоновна хайдах тобук ыарыытын аһардыбытын, бэйэтэ толкуйдаабыт эрчиллиилэрин көрдөрдө. Хоһоон хайдах айылларын кэпсээтэ, нойосуус ааҕан иһитиннэрдэ, кинигэлэрин автографтаан атыылаата.

Биир умнуллубат истиҥ көрсүһүүнү алыптаах эйгэни бэлэхтиир «Чурапчинская битва фокусников» кыайыылааҕа, «Арассыыйа Иллюзионистарын Ассоциацияларын «чилиэнэ, фокусник Федор Колосов үөрэнээччитэ Афанасий Говоров кэлэн араас трюктарын көрдөрдө. Кинини кытта Татьяна Павлуцкая ырыаларынан, үҥкүүнэн бу киэһэни киэргэттэ.

Орто Халыматтан төрүттээх  Николай Бандеров-Дьулууру кытта көрсүһүү буолла. Николай ыалдьар буолан уһуннук эмтэнэн 31 сааһыгар хаампыт олоҕун кэпсээниттэн кини олоххо тардыһыытын, билиҥҥи ситиһиилэриттэн киһи сөҕөр уонна холобур оҥостор киһитэ эбит. Николай хоһоон айар дьоҕурунан, бэйэтэ айбыт ырыаларынан дьон сүрэҕин долгутта.

Маны таһынан, Дьокуускай куорат Губинскай уокуругун бэтэрээннэрэ «Не стареют душой ветераны» кэнсиэртиир бырагырааманан, Надежда Ананина «В песне моя душа» диэн сахалыы, сэбиэскэй, Арассыыйа ааптардарын ырыаларынан кэнсиэрэ, «Сыдьаайа» творческай киин, «Сальма» үҥкүү ансаамбылын үҥкүүһүтэ Зигрида восточнай уонна индийскэй үҥкүүлэринэн,»Кэрэ эйгэ» бальнай үҥкүү ансаамбылын (сал.Мария Соловьева) эрчимнээх үҥкүүлэрин астына көрдүбүт. Сааһырдыбыт диэн дьиэҕэ олорон хаалбакка сөбүлүүр дьарыктарынан дьону үөрдэ сылдьалларын олус үөрэ-сөҕө көрдүбүт.

«Чэбдик» сонотуоруй медсиэстэрэтэ Евгения Германовна Матюнина «Цыганочканы» эрчимнээхтик үҥкүүлээн барыбыт кутун тутта. Өссө тарбаҕар талааннаах Ольга Мордовская баайыыга маастар-кылаас ыытта, оҥоһуктарын быыстапкалаан көрдөрдө. Бүтэһигэр эстрада тыйаатырыгар Тамара Попова «Мин артыыс олоҕум» кэнсиэригэр сылдьар элбэх ырыаһыттары илэ истэн астынныбыт.

Иккитэ сынньанан баран тахсааччыларга анаан биэчэрдэр тэрилиннилэр. Манна Надежда Николаевна сонотуоруйга сыппыт дьону түмүүгэ көмөлөспүт актыбыыстары бэлиэтээн сонотуоруй дьаһалтатын аатыттан Махтал суруктары туттарда. Өлөөн улууһун Оленёк бөһүөлэгиттэн сынньана кэлбит Яна Изиева сонотуоруйга сытар кэмигэр Надежда Николаевнаҕа тута араас тэрээһиннэри ыытарыгар дьону түмүүгэ көмөлөһөн сонотуоруй аатыттан Махтал суругунан, сэмэй бэлэҕинэн бэлиэтэннэ, үгүс киһи махталын ылыан ылла.

Яна ыраах улуустан кэлэн астына сынньаммытын, өссө да кэлэр былааннааҕын үөрэ-көтө үллэһиннэ. Биэчэрдэргэ сытааччылар күүстэринэн эҕэрдэ нүөмэрдэр көһүннүлэр уонна «ностальжи» дискотека тэриллэн астына үҥкүүлээтибит.

Киэһэтин өссө дуобаттаан, лотолаан, эр дьон бильярдаан күммүтүн туһалаахтык атаардыбыт. Күн аайы минньигэс аһынан тото аһатар үлэһиттэргэ, эмтиир-томтуур сиэстэрэ кыргыттарбытыгар барҕа махтал буолуохтун. Бу курдук икки нэдиэлэ биллибэккэ бэрт интэриэһинэйдик ааста. «Чэбдик» сонотуоруй-профилакторий бары үлэһиттэригэр, дьаһалтатыгар уонна бииргэ сыппыт, билсиспит дьоммутугар истиҥник махтанан тарҕастыбыт.

Мария Захарова, Балыктаах