Чурапчы киин балыыһата — бастыҥнар ортолоругар

Чурапчы улуустааҕы киин балыыһата өҥөнү оҥоруу усулуобуйатын хаачыстыбатын тутулуга суох сыаналааһын түмүгүнэн Саха сирин топ-10 мэдиссиинэ тэрилтэлэригэр киирдэ уонна «СТИМУЛ» сэртипикээти тутар чиэскэ тигистэ.

СӨ доруобуйа харыстабылын министиэристибэтиттэн иһитиннэрбиттэринэн, сэртипикээт  тэрилтэ билиҥҥи мэдиссиинэ быраактыкаларын олоххо киллэриигэ бэлэм буолуутун үрдүк таһымын бигэргэтэр уонна пациеннар сыаналааһыннарын индикаторынан буолар. Манна сүрүн оруолу РФ Бэрэсидьиэнэ Владимир Путин көҕүлээбит национальнай бырайыагын чэрчитинэн 2024 сыллаахха саҥа балыыһа комплексын үлэҕэ киллэрии сүрүн оруолу оонньообута.

Уопсайа үс тыһ. кв.м. тахса иэннээх аныгы комплекска 17 нэһилиэнньэлээх пуун 21  тыһ. тахса олохтооҕо көрдөрөр. Сыл ахсын балыыһаҕа 130 тыһ.кэриҥэ киһи көрдөрүммүтэ бэлиэтэнэр, отут тыһ. тахса чинчийии, диагностикалааһын уонна 480 тыһ. кэриҥэ лабораторнай анаалыс оҥоһуллар.

Саҥа тэрил баар буолан быраастар диагностика саҥа көрүҥнэрин, ол иһигэр электроэнцефалографияны (ЭЭГ) баһылаабыттар. Үрдүк технологиялаах көмөнөн туһаныы лаппа улааппыт: ааспыт сылга 1165 МРТ- чинчийии оҥоһуллубута ыйыллар.

Хирургия сулууспатыгар лапароскопическай эпэрээһийэлэри (холецистэктомия, аппендэктомия) оҥороллор уонна эчэйиигэ эндопротезирование киллэриллибит. 2022 сылтан балыыһа баазатыгар Дьокуускайдааҕы мэдиссиинэ кэллиэһин филиала үлэлиир. Быйыл биэлсэрдэр икки бөлөхтөрө уонна сиэстэрэлэр биир бөлөхтөрө дипломнарын ылыахтара. Үөрэҕи бүтэрээччилэр Алаҕарга, Мугудайга, Улахан Күөлгэ, Мырылаҕа үлэлиэхтэрэ, ол түмүгэр оройуоҥҥа каадыр боппуруоһа быһаарыллыаҕа. Аны билигин «зубной фельдшер» идэтин арыйыы былааннанар.

СӨ доруобуйа харыстабылын миниистирэ Лена Афанасьева бэлиэтээбитинэн, «СТИМУЛ» сэртипикээти тутуу — бу дьиҥнээх уларыйыыны хайдах баарынан көрөн сыаналааһын. Чурапчы улууһун киин балыыһата саҥатытан оҥоруу бырагырааматын көдьүүһүн көрдөрдө: саҥа дьиэ, аныгы тэрил, бастыҥ технология уонна каадырдары көхтөөхтүк бэлэмнээһин. Үлэ национальнай уонна эрэгийиэннээҕи бырайыактар чэрчилэринэн ыытыллар, ол иһигэр «Уһун уонна көхтөөх олох», «Здоровое будущее» уонна СӨ Ил Дархана Айсен Николаев доруобуйа харыстабылын тиһигин сайыннарыы туһунан ыйааҕыгар сөп түбэһиннэрэн.

Сиһилии: https://www.sakha.gov.ru/news/48946

СӨ Ил Дарханын уонна Бырабыыталыстыбатын пресс-сулууспата

Хаартыскалар: Чурапчы улууһун киин балыыһатыттан