Cыл саҕаланыаҕыттан «Аҕа дойдуну көмүскээччилэр» пуонда көмөтүнэн 170-тан тахса тэрээһин ыытылынна

Сыл саҕаланыаҕыттан «Аҕа дойдуну көмүскээччилэр» судаарыстыбаннай пуонда Саха сиринээҕи филиалын көмөтүнэн, бойобуой дьайыылар бэтэрээннэрин уонна байыаннай дьайыыга өлбүт кыттыылаахтар дьиэ кэргэттэрин кытыннаран, 11 тыһыынчаттан тахса киһини хабан, 172 тэрээһин ыытылынна. Бу туһунан брифиҥҥэ филиал салайааччытын уопсастыбаннай бырайыактарга солбуйааччы Владилена Абрамова иһитиннэрдэ.

«79 тэрээһин оҕону уонна ыччаты патриотическайдык иитиигэ, 50 – спортивнай уонна култуурунай-сынньалаҥ, 20-тэн тахса тэрээһин Аҕа дойду көмүскээччилэрин хорсун быһыыларын үйэтитиигэ ананан ыытылынна», – диэн Владилена Абрамова эттэ.

Кини дааннайынан, «Бэйэ дьоммутун бырахпаппыт!» социальнай-патриотическай бырайыак чэрчитинэн байыаннай дьайыыга өлбүт кыттыылаахтар 16 ийэлэрэ «По Государевой дороге» РЖД-турга Москва, Санкт-Петербург, Великий Новгород куораттарынан, оттон «Сибирь здесь» турунан Новосибирскай, Красноярскай, Томскай куораттарынан сырыттылар.

«Тимир суол туурдарын бырагырааматыгар куораттары кэрийэ сылдьан экскурсиялар, музейдарга, кэрэ-бэлиэ сирдэргэ сылдьыы, араас маастар-кылаастар киирбиттэрэ. Бу туурдары «Аҕа дойду көмүскээччилэригэр» судаарыстыбаннай пуонда уонна «РЖД Тур» хампаанньа, «Российские Железные Дороги» аһаҕас акционернай уопсастыба, РФ Оборуонатын министиэристибэтэ уонна СӨ Бырабыыталыстыбата өйөөн тэрийдилэр», – диэн филиал салайааччытын солбуйааччы кэпсээтэ.

Өрөспүүбүлүкэ олоҕор биир суолталаах тэрээһининэн АБДь кыттыылаахтарыгар анаммыт «Аҕа дойду көмүскээччилэрин Куубага» III Саха сиринээҕи комплекснай физкултуурунай тэрээһин буолла. Бу күрэхтэһиигэ инбэлииттээх АБДь бэтэрээннэрэ кытыннылар. Бу тэрээһини «Аҕа дойдуну көмүскээччилэр» пуонда Саха сиринээҕи филиала Өрөспүүбүлүкэтээҕи адаптивнай физкултуура уонна успуорт киинин кытта бииргэ ыытта.