Дьааҥы, Индигиир уонна Халыма өрүстэргэ уу таһыма үрдүк

Саха сиригэр муус хоту улуустарынан аһаар, Усуйаана улууһугар уу таһыма намтаан эрэр диэн иһитиннэрэр СӨ Ыксаллаах быһыыга-майгыга министиэристибэтэ. Саха сирин быыһыыр сулууспалара кутталы кыччатар дьаһаллары ылаллар.

Өлүөнэ өрүс (Булуҥ улууһа)

Муус алын кытыыта – Күһүүр нэһилиэгиттэн 170 км аллараа устар. Үөһээ кытыыта – Күһүүр нэһилиэгэр устар, уу таһыма 1727 см (кутталлаах таһыма – 3150 см). Көмүөл мууһун уһуна – 170 км, сууккаҕа 70 км сыҕарыйар. Чугастааҕы икки сууккаҕа муус улуус территориятынан ааһыаҕа.

Халыма өрүс

Муус Халыма өрүс төрдүгэр таҕыста. Зырянка аэропуордун көтөр-түһэр балаһата уонна Орто Халыма куорат намыһах учаастактара халаан уутугар 100% баран тураллар. Ол эрээри салгынынан сибээс баар: Орто Халыма аэропуордугар (бөртөлүөт нэдиэлэҕэ иккитэ: сэрэдэҕэ уонна субуотаҕа көтөр) стыковочнай рейстэр тэриллэллэр.

Өлөөн  өрүс (Өлөөн улууһа)

Муус алын кытыыта – Түүмэти нэһилиэгиттэн 60 км аллараа баар, уу таһыма –1612 см. Муус үөһээ кытыыта Түүмэти нэһилиэгиттэн 20 км үөһээ устар. Муус барыытын уһуна 80 км (сууккаҕа 45 км сыҕарыйар). Өрүс төрдүгэр муус 2-3 суукканан эстэрэ күүтүллэр.

Дьааҥы (Усуйаана улууһа)

Муус алын кытыыта Усуйаана нэһилиэгиттэн 33 км аллараа баар, уу таһыма – 1005 см (кутталлаах таһыма – 1023 см). Муус үөһээ кытыыта Усуйаана нэһилиэгэр бэлиэтэнэр. Көмүөл мууһун уһуна – 33 км (сууккаҕа сыҕарыйбатах). Усуйаана нэһилиэгэр 66 тиэргэн учаастага ууга турар, олорор дьиэлэр эмсэҕэлээбэтилэр. Аллараа Дьааҥы гидропост аттыгар 1-2 суукканан муус барара күүтүллэр.

Индигиир (Аллайыаха уонна Абый улуустара)

Муус алын кытыыта Чокурдаах нэһилиэгэр баар, уу таһыма – 854 см (кутталлаах таһыма – 913 см). Муус үөһээ кытыыта Үрүҥ Хайа нэһилиэгиттэн 220 км аллараа устар, уу таһыма – 1158 см (кутталлаах таһыма – 1350 см). Көмүөл мууһун уһуна – 193 км (сууккаҕа 113 км сыҕарыйбыт). Киэҥ Күөл сэлиэнньэтигэр 10 тиэргэн уонна 2 дьиэ итиэннэ Сыаганнаах сэлиэнньэтин намыһах учаастактара ууга тураллар. Индигиир өрүс төрдүгэр муус чугастааҕы 3-4 сууккаҕа устара күүтүллэр.

«Дьааҥы, Индигиир уонна Халыма өрүстэргэ уу таһыма үрдүк, хонууларга уу тахсыыта уонна намыһах учаастактарга халаан уута бэлиэтэнэр. Балаһыанньаны тупсарарга биэдэмистибэлэр икки ардыларынааҕы суһал бөлөхтөр үлэлииллэр. Бэҕэһээ сэрэтэр дьаһал быһыытынан Усуйаанаттан Казачьеҕа оҕолору уонна кыаммат дьону көһөрдүлэр. Арассыыйа ЫБММ уонна Саха сирин Быыһыыр сулууспатын быыһааччылара биэрэги бөҕөргөтөр үлэлэри ыыталлар, нэһилиэнньэҕэ аадырыстаах көмөнү оҥороллор уонна сэрэтэр үлэни ыыталлар. Өрөспүүбүлүкэ өрүстэригэр халаан балаһыанньатын кэтииргэ пилота суох көтөр авиация систиэмэлэрэ уонна Арассыыйа ЫБММ Хабаровскайдааҕы авиационнай-быыһыыр киинин Ми-8 бөртөлүөтүнэн кэтээн көрүү ыытыллар», — диэн Арассыыйа ЫБММ Саха сиринээҕи сүрүн управлениетын начаалынньыга Павел Гарин иһитиннэрэр.