Дьааҥыга халаан кэнниттэн 262 дьиэни бэрэбиэркэлээтилэр

Үөһээ Дьааҥы улууһугар Тутуу министиэристибэтин исписэлиистэрэ биэс нэһилиэккэ халаан уутуттан эмсэҕэлээбит 262 олорор дьиэни бэрэбиэркэлээтилэр. Билиҥҥи дааннайдарынан, олортон 94-гэр хапытаалынай өрөмүөн наада, оттон биир чааһынай дьиэ олорорго туһаттан тахсыбыта билиннэ. Бу туһунан Саха сирин бырабыыталыстыбатын бэрэссэдээтэлин бастакы солбуйааччытын эбээһинэһин толорооччу Николай Бочков салайыытынан ыытыллыбыт ыксаллаах быһыыга-майгыга хамыыһыйа мунньаҕар иһитиннэрдилэр.

Исписэлиистэр бэрэбиэркэ аахталарын оҥорууну түмүктээн эрэллэр уонна дьиэлэри чөлүгэр түһэрэргэ төһө тутуу матырыйаала наадатын быһаараллар. Чуолаан, сылытар тэриллэр, ДВП уонна ДСП наада буолуохтара. Николай Бочков  Тутуу министиэристибэтигэр Үөһээ Дьааҥы улууһун дьаһалтатын кытта бииргэ тутуу матырыйаалыгар уопсай наадыйыыны кылгас кэм иһигэр быһаарарга сорудахтаата.

Саахал кэнниттэн чөлүгэр түһэрэр үлэлэргэ 119 киһи уонна 7 тиэхиньикэ кыттар. Ону тэҥэ, чөлүгэр түһэриигэ устудьуоннар тутууга этэрээттэрэ тардылыннылар. Улууска 36 туоннаттан тахса гуманитарнай көмө тиэрдилиннэ. Эмсэҕэлээбит нэһилиэктэртэн 63 оҕоҕо Дьокуускайга «Энергетик» лааҕырга сынньалаҥ тэрилиннэ. Мунньахха маны таһынан оту бэлэмнээһин, эмсэҕэлээбит олохтоохторго төлөбүрдэри, ититиини хааччыйар эбийиэктэр туруктарын уонна гуманитарнай көмөнү салгыы тиэрдии боппуруостарын дьүүллэстилэр.

Эмсэҕэлээбиттэргэ көмөнү хомуйуу салҕанар. Олохтоохтортон уонна тэрилтэлэртэн баҕа өттүнэн бэриллэр харчынан көмөнү анал счетка тутталлар. Оттон гуманитарнай көмөнү Саха Өрөспүүбүлүкэтин Добровольчествоҕа ресурсалыыр киинигэр маннык аадырыска аҕалан биэриэххэ сөп: Дьокуускай куорат, Орджоникидзе уул., 10.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.