Дьааҥыга сүппүт дьахтары буллулар

Бэс ыйын 19 күнүгэр Дьааҥытааҕы ЕДДС-ка Үүттээх нэһилиэгэр 1950 с.т. дьахтар сүппүтүн туһунан иһитиннэрии киирбит. Бу туһунан СӨ Быыһыыр сулууспата иһитиннэрэр.

Дьахтар кыыһа эппитинэн, кини бэс ыйын 18 күнэ үүнэр түүнүгэр дьиэтиттэн тахсыбыт уонна кэлбэтэх. Оҕолор тыа диэки баран иһэрин көрбүттэр.

Бэс ыйын 19 күнүгэр 18 ч. СӨ Быыһыыр сулууспатын биэс быыһааччыта уонна волонтердар дьахтары көрдүү туруммуттар. 22:30 ч. Үүттээхтэн 5 км тэйиччи сиртэн булбуттар. Дьахтар доруобуйата этэҥҥэ.