Дьиэҕэ киирэн, тоҥ эти, балыгы уорбут

Ньурба улууһунааҕы дьуһуурунай чааска биир дьахтар чааһынай дьиэтиттэн бородуукталары уорбуттарын туһунан иһитиннэрбит. Материальнай хоромньу 6,5 тыһыынча солкуобайга тэҥнэспит. 

Полиция үлэһиттэрэ суһаллык көрдөөн, чинчийэн, 22 саастаах, урут сууттана сылдьыбыт киһини туппуттар.

Бу киһи түүн ааһан иһэн, дьиэҕэ ким баарын-суоҕун билээри, тоҥсуйан көрбүт. Ким да суоҕун билэн баран, дьиэҕэ киирбит уонна халадыынньыктан тоҥ эти,  балыгы, ону тэҥэ, үнүстүрүмүөннэри уоран илдьэ барбыт.

РФ Холуобунай кодексын «Уоруу» 158 ыстатыйатын 3-с чааһынан холуобунай дьыала тэрилиннэ диэн ИДьМ пресс-сулууспата иһитиннэрэр.