Дьокуускай аэропуордугар полицейскайга бэрик биэрэ сатаабыт омук киһитэ сууттаныа

Саха сиригэр тырааныспар полициятын үлэһитигэр харчы бэрик сатаабытыгар буруйданар атын дойду гражданина сууттаныа.

Дьокуускай куорат аэровокзалын дьиэтигэр патруллааһын кэмигэр ИДьМ Уһук Илиннээҕи тырааныспар полициятын үлэһиттэрэ уопсастыбаннай сиргэ итирик туруктаах эр киһини бэлиэтии көрбүттэр. Буруйдаах аэропуорка киирэр бэрэбиэркэни ааһарыгар тас көрүҥэ уратыта бэлиэтэммит. 

Балаһыанньаны быһаарар инниттэн эр киһини полиция дьуһуурунай хоһугар илдьибиттэр. Докумуонун бэрэбиэркэлээн уонна РФ Административнай буруйу оҥоруу кодексатын 20.21 ыстатыйатынан боротокуол толороллоругар, киһилэрэ эппиэтинэстэн куотунар инниттэн тырааныспар полициятын үлэһитигэр 5 тыһыынча солкуобай харчыны бэрик быһыытынан биэрэ сатаабыт.

Полицейскай маннык быһыы-майгы иһин холуобунай эппиэтинэс көрүллэрин туһунан хаста даҕаны сэрэппитин үрдүнэн, омук киһитэ тохтооботох. Тырааныспар полициятын үлэһитин хоруупсуйаҕа буруйу оҥорууга күһэйии туһунан салалтаҕа тута иһитиннэриллибит.

Билиҥҥи туругунан, РФ Холуобунай кодексатын 30 ыстатыйатын 3 чааһынан уонна 291.2 ыстатыйатын 1 чааһынан тэриллибит холуобунай дьыала борокуруор бигэргэтиитинэн суукка ыытылынна. Бу туһунан Уһук Илиннээҕи тырааныспар полицията иһитиннэрэр.