Дьокуускай – Аллараа Бэстээх хайысханан 30-ча салгын олбохтоох суудуна үлэлиэҕэ

Сааскы суол-иис алдьанар кэмигэр «Дьокуускай – Аллараа Бэстээх» хайысханан дьону таһарга 25-тэн 30-ка диэри салгын олбохтоох суудунаны (СВП) сырытыннарар былааннанар. Бу туһунан СӨ Тырааныспарга уонна суол хаһаайыстыбатыгар миниистирэ Владимир Сивцев «Актуальное интервью» биэриигэ иһитиннэрдэ.

Өрөспүүбүлүкэтээҕи биэдэмистибэ салайааччыта этэринэн, муус устар кэмигэр «Тайфун» көрүҥнээх аэроботтар эмиэ үлэлиэхтэрэ. Дьону таһыы Дьокуускайдааҕы 204-с түөлбэ «Намыв» пуунуттан Аллараа Бэстээхтээҕи пассажирдар терминалларыгар диэри ыытыллыаҕа.

Владимир Сивцев бэлиэтээбитинэн, тиһэх кэмҥэ инфраструктураны тупсарыыга биллэр үлэ ыытылынна — пассажирдар кэтэһэр сылаас терминаллара тэрилиннилэр.

«Бу үлэ салҕаныаҕа. Инникитин тырааныспар куттала суох буолуутун күүһүрдүү, өҥө хаачыстыбатын үрдэтии уонна айан сыаната дьоҥҥо-сэргэҕэ тиийимтиэ буоларын хааччыйыы былааннанар», — диэтэ Владимир Сивцев. Маны таһынан, салгын олбохтоох суудуналарынан дьону таһыы өрөспүүбүлүкэ атын да туорааһыннарыгар тэриллиэҕэ.