Дьокуускай аннынан муус ыам ыйын 14 күнүгэр хамсыыра күүтүллэр

Барыллаан дааннайдарынан, быйыл Өлүөнэ мууһа Дьокуускай аннынан ыам ыйын 14 күнүн диэки хамсыыра күүтүллэр. Бу туһунан СӨ Быыһыыр сулууспатын начаалынньыга Иннокентий Андросов СӨ Гидрометкиинигэр сыылкалаан туран иһитиннэрдэ.

«Өрөспүүбүлүкэ сиригэр-уотугар, Ленскэй оройуонун Витим бөһүөлэгин аннынан муус ыам ыйын 2 күнүгэр хамсаан саҕалыаҕа. Ленскэй куорат диэки ыам ыйын 3-4 күннэригэр тиийиэҕэ. Оттон Дьокуускайга ыам ыйын 14 күнүгэр хамсыыра күүтүллэр», — диэн начаалынньык эттэ.

Урукку сылларга киин куорат аннынан муус ыам ыйын 18 күнүн диэки хамсааччы. Былырыын ыам ыйын 15 күнүгэр хамсаабыта бэлиэтэнэр.