Дьокуускай куорат Арассыыйа ыччатын киин куоратынан буолуон сөп

Арассыыйа ыччатын дьыалаларыгар федеральнай ааҕыныстыбата (Росмолодежь) «Ыччат уонна оҕолор» национальнай бырайыак чэрчитинэн ыытар «Ыччат кэмэ» диэн ыччат ситиһиилэрин Бүтүн Арассыыйатааҕы бириэмийэтин иһинэн «Арассыыйа ыччатын киин куората» диэн аат иһин Дьокуускай куорат киирсэр. Бу туһунан Дьокуускай куорат  дьаһалтатын пресс-сулууспата иһитиннэрдэ.

Бу туох бириэмийэний?

«Ыччат кэмэ» — ыччат бэлиитикэтин эйгэтигэр ситиһиилэри билинэргэ, саҥа көҕүлээһиннэри өйүүргэ уонна дойду үрдүнэн ыччаты кытта үлэ бастыҥ уопутун тарҕатарга анаммыт сылын аайы туттарыллар бириэмийэнэн буолар.

«Арассыыйа ыччатын киин куората» анал номинация куораттарга  ситиһиилэрин, эдэр дьон дьоҕурдарын арыйалларыгар баар кыахтары, ыччат инфраструктуратын сайдыытын уонна көхтөөх ыччаты түмэр бырайыактарын туһунан кэпсииллэригэр кыах биэрэр.

Кыайыы Дьокуускайга тугу биэрэрий?

•  Куораппыт федеральнай таһымҥа биллиитэ улаатыаҕа;
•  Ыччат бырайыактарыгар уонна көҕүлээһиннэригэр болҕомтону тардарга көмөлөһүөҕэ;
• Атын эрэгийиэннэри кытта уопут атастаһарга уонна бииргэ үлэлииргэ саҥа кыахтары арыйыаҕа;
• Дьокуускайга ыччат үөрэнэр, сайдар, бэйэтин санаатын олоххо киллэрэр уонна олоҕу тупсарар кыахтаах куорат быһыытынан статуһун бөҕөргөтүөҕэ.

Бу туох суолталааҕый?

Ыччат киин куората — бу бочуоттаах аат эрэ буолбатах. Ити куорат кыаҕын,  олохтоохторун уонна, саамай сүрүнэ, куорат бүгүҥҥүтүн уонна сарсыҥҥытын айар эдэр дьон үлэлэрин-хамнастарын билиниинэн буолар.

Дьокуускай талааннаах ыччаттардаах, көхтөөх түмсүүлэрдээх, интэриэһинэй бырайыактардаах  уонна ураты култууралаах. Биһиги сорукпут — бу туһунан бүтүн Арассыыйаҕа кэпсээһин!

Дьокуускайбытын бары бииргэ өйүөххэ!

«ВКонтакте» социальнай ситимҥэ  тарҕатыҥ уонна тоҕо чуолаан биһиги куораппыт 2027 сылга Арассыыйа Ыччатын киин куората буолуохтааҕын туһунан кэпсээҥ. Дьокуускайга таптыыр сирдэргитин, устуоруйалары, ситиһиилэргитин уонна инникитин хайдах буолуохтааҕын туһунан санааларгытын үллэстиҥ.

Хас биирдии иһитиннэрии — биһиги ыччаппыт тугунан олорорун уонна Дьокуускай кыайыыга тоҕо тиийиэхтээҕин көрдөрөргө улахан кыах!

Сиһилии: https://www.sakha.gov.ru/news/67083