Дьокуускай куорат үөрэҕин тэрилтэлэригэр сэрэтэр дьаһаллар ылыллаллар

Роспотребнадзор чахчытынан, балаҕан ыйын 7-13 күннэригэр Дьокуускайга 5495 киһи гирииптээбит уонна ОРВИнан ыалдьыбыт. Билигин куорат оскуолаларыгар уонна уһуйааннарыгар үөрэх эрэсиим быһыытынан салҕанар.

Саҥа үөрэх дьылыгар “Дьокуускай куорат” куораттааҕы уокурук оскуолаларыгар барыта 57221 оҕо үөрэнэр, уһуйааҥҥа 20332 иитиллээччи баар.

Күһүҥҥү кэмҥэ дьаҥ элбээбитинэн сибээстээн, куорат сорох үөрэҕин тэрилтэлэригэр быстах кэмҥэ хааччахтыыр миэрэлэр киирдилэр, сорох кылаастар тэйиччиттэн көрүҥҥэ көстүлэр. Маннык миэрэлэр тэрилтэ эпидемиологическай быһыытын-майгытын учуоттаан, биирдиилээн ылыллаллар.

Оскуолаларга уонна уһуйааннарга хас күн ахсын ыарыыны сэрэтэр дьаһаллар ыытыллаллар: хостору салгылаталлар, салгыны ыраастыыллар, дезинфекциялыыр сириэстибэлэри туһанан сууйаллар-сотоллор, уо.д.а.

Билиҥҥитэ куорат үөрэҕин тэрилтэлэригэр бүтүн куораттааҕы харантыын биллэриллэ илик диэн Дьокуускай куорат үөрэҕин управлениета иһитиннэрдэ.