Дьокуускай–Пекин: Кытайга түөрт аҥаар чааһынан

Кытайга сынньана эбэтэр үлэ дьыалатынан айанныан баҕарар дьоҥҥо үөрүүлээх сонун! Быйыл алтынньы ый бүтүүтүттэн Дьокуускайтан Пекиҥҥэ диэри быһа көтөр рейстэр оҥоһуллуохтара.

S7 авиахампаанньа бу дьыл алтынньы 27 күнүттэн Саха сирин киин куоратыттан Кытайга быһа көтөрүн былаанныыр. Ол курдук, Дьокуускайтан Пекиҥҥэ диэри айан бириэмэтэ быһа холоон түөрт аҥаар чааһы ылыаҕа. Бу хайысхаҕа пассажирдары таһар Boeing 737-800 сөмөлүөттэр үлэлиэхтэрэ. Оттон сөмөлүөт Кытайга Дасин диэн норуоттар икки ардыларынааҕы саҥа, улахан аэропорка түһүөҕэ.

Рейстэр нэдиэлэҕэ иккитэ оҥоһуллуохтара. Айанныыр дьоҥҥо табыгастаах буоллун диэн, араспысаанньа маннык оҥоһуллубут:

• Дьокуускайтан Пекиҥҥэ: оптуорунньукка уонна субуотаҕа.
• Пекинтэн Дьокуускайга: сэрэдэҕэ уонна баскыһыанньаҕа.

Саҥа рейстэр Саха сирин уонна Кытай икки ардыгар туризм, эргиэн уонна култуура ситимэ өссө күүскэ сайдарыгар олук буолуохтара диэн күүтүллэр.