Дьокуускай сыбаалкатыгар баһаары умуруоруу салҕанар

Бэс ыйын 1 күнүн туругунан, Дьокуускай куорат кытаанах хомунаалынай тобохторун полигонугар, Бүлүүлүүр аартык 9-с килэмиэтиригэр, баһаар содулларын туоратыыга күүстээх үлэ салҕанар диэн куорат дьаһалтатын пресс-сулууспата иһитиннэрэр.

Ыам ыйын 31 күнүгэр киэһэ баһаар иэнин төгүрүтэн, салгыы барарын хааччахтаабыттара. Хата, тыал соҕурууттан үрэр буолан, буруота куоракка тарҕамматаҕа. Ол эрээри, куорат хотугу өттүгэр буруо сыта биллэр этэ. Сүрүннээн былаастык умайар буолан, буруо тыынар уорганнарга, киһи доруобуйатыгар куһаҕаннык дьайар.

Билигин  умайа сытар сири кумаҕынан саба кутуу уонна бөх умайар иэнин салгыы аччатыы үлэтэ ыытыллар. Уот хаттаан тарҕамматын, күөдьүйэн тахсыбатын туһугар, умуруоруу үлэтэ тохтобула суох, түүннэри-күнүстэри ыытыллар.

Баһаары умуруорууга уонна баһаартан сэрэхтээх буолууну хааччыйыыга ыарахан тиэхиникэ: 2 бульдозер, 2 фронтальнай погрузчик, кумаҕы аҕалыыга 6 самосвал, 10-тан тахса киһи солбуһан үлэлиир.

Дьокуускай куорат баһылыгын солбуйааччы Владислав Слепцов иһитиннэрбитинэн, умайа сытар сири саба кутууга наадалаах кумах саппааһа баар.

«Билигин салгыы баһаар тахсыбатын туһугар бары күүспүтүн уурабыт. Биһиги балаһыанньаны хонтуруолга тутабыт уонна содуллары суһаллык суох оҥорорго наадалааҕы барытын оҥоробут», – диэн бэлиэтээтэ Владислав Слепцов.