Дьокуускайга 203-с түөлбэҕэ граната көһүннэ, сырыы тохтотулунна

«Эхо столицы» хаһыат иһитиннэрэринэн, бүгүн Дьокуускай куораттааҕы биир кэлим диспетчерскэй сулууспаҕа 203-с түөлбэҕэ граната баарын туһунан аата-суола биллибэт киһи эрийбит.

Сайабылыанньа киирээтин кытта, этиллибит сиргэ тустаах сулууспалар суһаллык тахсыбыттар. Ларионов уулуссатыгар баар бөх быраҕар контейнердарга  кырдьык гранатаҕа маарынныыр тэрили булбуттар.

«Бөх быраҕар баахха граната көһүннэ — билигин бу дьиҥнээх  эбэтэр үөрэнэргэ аналлаах граната буолара биллибэт. Бу сиргэ гаас үлэһиттэрэ, ФСБ, ИДьМ, суһал көмө уонна баһаарынайдар үлэлии сылдьаллар», — диэн Губинскай уокурук упрабатын баһылыга Андрей Михайлов  кэпсээбит.

Билиҥҥи туругунан, куттал суох буолуутун хааччыйар туһугар оройуоҥҥа массыына уонна сатыы дьон сырыыта  быстах кэмҥэ тохтотулунна.