Дьокуускайга архитектура уонна дизайн дэкээдэтэ саҕаланна

Дьокуускайга кэлэр кэминээҕи уонна билигин үлэлии сылдьар архитектордары, дизайнердары, преподавателлэри уонна устудьуоннары түмпүт архитектура уонна дизайн дэкээдэтэ саҕаланна. Тэрээһин «Патриот» ыччат киинигэр арылынна.

Саха Өрөспүүбүлүкэтин Ил Дарханын иһинэн Архитектураҕа уонна куораты тутууга управлениетын салайааччыта Любовь Папок бэлиэтээбитинэн, дэкээдэ идэлээх уопсастыба олоххо киириэн сөптөөх идэйэлэрин дьүүллэһэр суолталаах былаһаакканан буолла.

«Быйылгыттан биһиги дэкээдэбит өрөспүүбүлүкэтээҕи тэрээһин буолла. Ону тэҥэ быйыл ХИФУ Инженернэй-тэхиниичэскэй институтун архитектураҕа уонна куораты тутууга кафедрата 15 сыллаах үбүлүөйүн бэлиэтиирэ улахан суолталаах. Бу — биһиги кэлэр кэминээҕи инженердэрбит уонна архитектордарбыт. Маны таһынан биһиги быстыбат үөрэхтээһин (непрерывное образование) туһунан этэбит, манна Архитектордар сойуустарын иһинэн үлэлиир, 30 сылын бэлиэтиир архитектура уонна дизайн оскуола-устуудьуйата көмөлөһөр», — диэн бэлиэтээтэ Любовь Папок.

Саха сирин кылаабынай архитекторын тылларынан, дэкээдэ чэрчитинэн архитектуранан уонна дизайнынан интэриэһиргиир устудьуоннары уонна оскуола оҕолорун кытта көрсүһүүлэр, ону тэҥэ тематическай быыстапкалар былаанналлар.

«“Патриот” киинигэр көлүөнэлэр ситимнэригэр анаммыт олус үчүгэй быыстапка бара турар. Манна маастардар уопуттара уонна инникитин өрөспүүбүлүкэбит сайдыытыгар бэйэлэрин кылааттарын киллэриэхтээх эдэр талааннар кыахтара көрдөрүлүннэ. Биһиги тэрээһиммит идэ таһымын сайыннарарга, Саха сирин куораттарыгар уонна тыаларыгар олох хаачыстыбатын тупсарарга көмөлөһөр», — диэтэ кини.

Архитектура уонна дизайн дэкээдэтэ муус устар 7 күнүгэр диэри салҕаныаҕа. Бырагыраамаҕа элбэх үөрэтэр уонна дьыалабыай тэрээһиннэр киирдилэр: BIM-бырайыактааһыҥҥа сэминээрдэр, куораты тутууга кэмпириэнсийэ, архитектурнай бюроларга аһаҕас аан күннэрэ уонна ыччат бырайыактыыр сиэссийэлэрэ. Ону тэҥэ муус устар 8 күнүгэр диэри куорат олохтоохторо Дьокуускай араас былаһааккаларыгар буолар тематическай архитектурнай быыстапкаларга уонна инсталляцияларга сылдьыахтарын сөп. Сиһилии: https://www.sakha.gov.ru/news/42328

Санаттахха, архитектура уонна дизайн дэкээдэтин ыытыы Арассыыйа Бэрэсидьиэнэ Владимир Путин көҕүлээбит «Олоххо-дьаһахха инфраструктура» национальнай бырайыак сыалларын олоххо киллэрэргэ көмөлөһөр. Нацбырайыак дойду бары эрэгийиэннэригэр уонна муниципальнай тэриллиилэригэр олорорго аныгы, табыгастаах, куттала суох уонна тупсаҕай эйгэни тэрийиигэ туһаайыллар.