Дьокуускайга баан каартатыттан харчы уорбут оҕо сууттаныа

Дьокуускай куоракка сааһын ситэ  илик оҕо атын киһи баанын каартатыттан харчы уорбутугар буруйданан сууттаныаҕа диэн СӨ Борокуратуурата иһитиннэрэр.

Силиэстийэ сабаҕалыырынан, эдэр киһи 2024 сыл муус устар ыйыгар Поярков уулуссатын дьиэлэриттэн биирдэрин таһыгар баан каартатын булбут. Кини ол каартаны туһанан, тоҕус күн устата Дьокуускай куорат араас маҕаһыыннарыгар табаар атыыласпыт. Түмүгэр, каарта хаһаайыныгар 46 тыһыынча солкуобайтан тахса суумалаах хоромньуну оҥорбут.

Билиҥҥи туругунан, РФ Холуобунай кодексатын 158-с ыстатыйатын 3-с чааһын «г» пуунугар олоҕуран холуобунай дьыала тэриллэн, борокурор дьыаланы суукка көрөргө ыытта.