Дьокуускайга «Өлбөт үйэлээх полк» аахсыйаҕа 35 тыһыынчаттан тахса киһи кытынна

Бүгүн, ыам ыйын 9 күнүгэр, Дьокуускайга ыытыллыбыт «Өлбөт үйэлээх полк» аахсыйаҕа 35 тыһыынчаттан тахса киһи кытынна. 

Кыайыы күнүгэр, өрөспүүбүлүкэ киин куоратын уонча тыһыынча олохтооҕо куорат уулуссаларынан фронтовиктар, тыыл үлэһиттэрэ, сэрии хонуутугар уонна тыылга Кыайыыны чугаһаппыт дьоннорун мэтириэттэрин тутан сэлэлии хаамтылар.

Аахсыйаҕа Саха сирин Ил Дархана Айсен Николаев кыттыыны ылла. Кини Сталинград көмүскээччитэ Андрей Титович Титаро — эһэтин мэтириэтин тутан сэлэлии хаамта.

«Сыл-хонук аастар, сэрии туһунан өйдөбүл биһиги хас биирдиибит сүрэҕэр баар. Хас биирдии дьиэ кэргэҥҥэ фронтовиктары уонна тыыл үлэһиттэрин ытыктабылынан ахталлар. Бүгүн «Өлбөт үйэлээх полк» колоннатыгар 35 тыһыынчаттан тахса Дьокуускай олохтооҕо эһэлэрин, эбэлэрин, ийэлэрин, аҕаларын, убайдарын уонна эдьиийдэрин мэтириэттэрин тутан, Кыайыыга кылааттарын киллэрбит дьоннорун үрдүк чиэстээхтик тутан сэлэлии хаамтылар. Мин Донской фронт 65-с аармыйатын 252-с стрелковай дивизиятын 932-с стрелковай полкатын пулеметчига, Сталинград куораты дьоруойдуу көмүскээччитэ Андрей Титович Титаров — эһэм мэтириэтин тутан сэлэлии хаамтым», — диэн Айсен Николаев бэлиэтиир.

Дьокуускайга бырааһынньыктааҕы тэрээһиннэр Кыайыы болуоссатыгар «Воинам-победителям» өйдөбүнньүгэр сибэкки дьөрбөтүн уурууттан уонна Аҕа дойду Улуу сэриитигэр 1941–1945 сс. Кыайыы 81 сылыгар аналлаах миитинтэн саҕаланнылар. Ол кэнниттэн байыаннай-патриотическай сэлэлии хаамыы буолла.

«Өлбөт үйэлээх полк» — Аҕа дойду Улуу сэриитин суолталаах дааталарыгар анаммыт өйдөбүнньүк аахсыйата. Сыл ахсын дойду бары эрэгийиэннэриттэн кыттааччылар аймахтарын — сэриилэспит дьоннорун, тыыл үлэһиттэрин уонна Кыайыыга кылааттарын киллэрбит дьоннорун мэтириэттэрин тутан сэлэлии хаамаллар.

Авхсыйа устуоруйата 2007 сыллаахха Тюмень куоракка «Парад победителей» диэн ааттаах сэлэлии хаамыыттан саҕаламмыта. 2015 сылтан аахсыйа Бүтүн Арассыыйатааҕы буолбута.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.