Дьокуускайга итирик дьахтар маҕаһыыны халаабыт 

ИДьМ «Дьокуускайдааҕы» 3-с №-дээх отделын дьуһуурунай чааһыгар итирик туруктаах дьахтар маҕаһыыҥҥа киирэн, кассаттан 6 тыһыынча солкуобайы уоран куоппутун туһунан эргиэн туочукатын бас билээччититтэн иһитиннэрии киирбит, диэн СӨ ИДьМ пресс-сулууспата иһитиннэрэр.

Көрдүүр тэрээһиннэр кэмигэр холуобунай ирдэбил үлэһиттэрэ уорбаланааччыны быһаарбыттар. Буруйдаах урут доруобуйаҕа соруйан ыар эчэйиини оҥорбутун иһин сууттаммыт 39 саастаах, Дьокуускай куораттан төрүттээх дьахтар буолара биллибит.

Кэлин быһаарыллыбытынан, быһылаан буолбут күнүгэр уорбаланааччы арыгы иһэн баран, салгыы арыгылыырга санаабыт, ол эрээри харчыта суох эбит. Ол иһин кини урут үлэлии сылдьыбыт маҕаһыыныгар барарга быһаарыммыт. Хара санаалаах дьахтар кассаттан харчыны аһаҕастык уоран, тохтото сатаабыттарын үрдүнэн, быһылаан буолбут сириттэн куоппут. Уоруллубут харчытынан уорбаланааччы ас-үөл уонна арыгы атыыласпыт.

РФ Холуобунай кодексатын 161-с ыстатыйатын 1-гы чааһынан («Халааһын») холуобунай дьыала көбүтүлүннэ. Бу ыстатыйанан  буруйдаах 4 сылга диэри көҥүлэ быһыллыан сөп.