Дьокуускайга Ленин уонна Курашов уулуссаларыгар баар арыгы атыылыыр тэрилтэлэри борокуратуура бэрэбиэркэлиэҕэ

Дьокуускай куорат киин уокуругун управата Ленин проспегын 14 уонна 16, ону тэҥэ Курашов уулуссатын 19 нүөмэрдээх элбэх кыбартыыралаах дьиэлэрин тиэргэнигэр турар арыгы атыылыыр  тэрилтэлэри бэрэбиэркэлииргэ көрдөһөн, Дьокуускай куорат борокуратууратыгар сайабылыанньа ыытта. Олохтоохтор уопсастыбаннай бэрээдэги, чуумпуну уонна санитарнай нуормалары мэлдьи кэһэллэригэр хаста даҕаны үҥсүбүттэр.

Олохтоохтор этэллэринэн, «ПивоRoob» уонна «Норэбан» (Короленко уул., 2/2 уонна 2/2а) тэрилтэлэр уопсастыбаннай аһылык эбийиэктэринэн үлэлээн, арыгыны күнүстэри-түүннэри, суукканы быһа үлэлиир маҕаһыын курдук үлэлииллэр. Бу тэрилтэлэр тастарыгар итирик дьон, оннооҕор сокуоннай саастарын ситэ илик оҕолор мусталлар, мэлдьи охсуһуулар тахсаллар, онку кытта тулалыыр сир-уот арыгы иһэр уонна антисанитария уйатыгар кубулуйбут.

Управаҕа бу быһыыны-майгыны болҕомтото суох хаалларбаттарын бэлиэтээтилэр. Бэрэбиэркэ түмүгүн уонна ылыллыбыт дьаһаллар тустарынан эбии иһитиннэриэхтэрэ.