Дьокуускайга «Мин идэм – ИТ» күрэх кыайыылаахтара билиннилэр

Дьокуускайга муус устар 3 күнүгэр «Мин идэм – ИТ» (Моя профессия – ИТ) Бүтүн Арассыыйатааҕы күрэх өрөспүүбүлүкэтээҕи түһүмэҕин түмүгэ таҕыста. Наҕараадалааһын уонна сабыллыы үөрүүлээх тэрээһинэ 39-с нүөмэрдээх орто оскуолаҕа буолан ааста. Уонунан кыттааччылар номинацияларга тигистилэр уонна анал бириистэри ыллылар.

Хамаанданан номинациялар ортолоругар сүрүн бирииһи Арктикатааҕы судаарыстыбаннай ускуустуба, култуура уонна креативнай индустриялар университетын (АГИКИ) «ЭВМ+» хамаандата ылла. Кинилэр 5-с трегинэн «Исписэлиистэр» (Специалисты) категорияҕа бастакы миэстэни ыллылар. Кыайыылаахтарга күрэх сүрүн спонсорыттан — Сбер Дьокуускайдааҕы салаатыттан диплом уонна 75 тыһыынча солкуобайга сэртипикээт туттарылынна.

Хамаанда састаабыгар биэс киһи киирдэ. Күрэх чэрчитинэн кинилэр туһанааччыларга төрөөбүт күнү тэрийэргэ көмөлөһөр ИИ-агены (искусственнай интеллект агенын) оҥорон таһаардылар уонна Сбер GigaChat (ГигаЧат) нейросетигэр киллэрдилэр.

«Биһиги ИИ-агены оҥоруу кейсин талбыппыт. Сакаасчыппыт — Сбер. Кейс олус уустук буолан биэрбитэ, хамаандалар бары толору оҥорон таһаарбатахтара. Биһиги кыайыахпыт диэн санаабатахпыт, ол эрээри түмүгэр бастакы миэстэни ыллыбыт. Бу олус улахан уопут уонна Бүтүн Арассыыйатааҕы түһүмэххэ путевка буолар. Барыта үрдүк таһымҥа ааста, тэрийээччилэр — маладьыастар», — диэн «ЭВМ+» хамаанда менеджера Эдгар Иванов кэпсээтэ.

Күрэх финалыгар муниципальнай сүүмэрдээһиннэри ааспыт Саха сирин 25 улууһуттан 200-тэн тахса оскуола үөрэнээччитэ уонна устудьуон таҕыста. Кыттааччылар ИТ-бырайыактар прототиптарын оҥордулар.

«Дьокуускайтан эрэ буолбакка, улуустартан элбэх хамаанда кэлбитэ үөрдэр. 2016 сыллаахха буолбут бастакы күрэҕи өйдүүбүн — оччолорго таһым олох атын этэ. Билигин оҕолор бэйэлэрэ туспа идиэйэлээх, бэйэлэрэ тутулуга суох үлэлиир кыахтаах бэлэм айтишниктар буолбуттар. Билии-көрүү үрдээн иһэр, онон биһиги бу үлэни салгыахпыт», — диэн Саха сиринээҕи инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев бэлиэтээтэ.

«Мин идэм – ИТ» күрэх өрөспүүбүлүкэҕэ 2016 сылтан сыл аайы ыытыллар уонна эдэр көлүөнэҕэ ИТ-эйгэтигэр саамай суолталаах, киэҥ далааһыннаах тэрээһиннэртэн биирдэстэрэ буолар. Күрэх ыччат сыыппараҕа сатабылын сайыннарарга уонна үрдүк технологиялаах салааларга каадыр резервэтин оҥороругар көмөлөһөр. Бу кэм иһигэр күрэххэ 40 тыһыынча кэриҥэ киһи кытынна. 2023 сыллаахха тэрээһин бастакытын федеральнай таһымҥа тахсыбыта. Оттон 2025 сыллаахха «Россия — страна возможностей» диэн бэрэсидьиэн платформатын бырайыактарын кэккэтигэр киирдэ.